Mahāparinibbānasuttaṁ (DN 16)

[Paṭhamabhāṇavāraṁ]

[9: Ambalaṭṭhikā-Dhammakathā]

Atha kho Bhagavā Rājagahe yathābhirantaṁ viharitvā, āyasmantaṁ Ānandaṁ āmantesi: [104]

“Āyām' Ānanda yena Ambalaṭṭhikā tenupasaṅkamissāmā.” ti [105]

“Evaṁ Bhante,” ti kho āyasmā Ānando Bhagavato paccassosi. Atha kho Bhagavā mahatā bhikkhusaṅghena saddhiṁ yena Ambalaṭṭhikā tad-avasari. Tatra sudaṁ Bhagavā Ambalaṭṭhikāyaṁ viharati Rājāgārake. [106]

* * *

Tatra pi ChS: Tatrāpi, here and below.01 sudaṁ Bhagavā Ambalaṭṭhikāyaṁ viharanto Rājāgārake, etad-eva bahulaṁ bhikkhūnaṁ Dhammiṁ kathaṁ karoti: [107]

“Iti sīlaṁ, iti samādhi, iti paññā, Thai: Iti pi sīlaṁ, iti pi samādhi, iti pi paññā.02 sīlaparibhāvito samādhi mahapphalo hoti mahānisaṁso, samādhiparibhāvitā paññā mahapphalā hoti mahānisaṁsā, paññāparibhāvitaṁ cittaṁ sammad-eva āsavehi vimuccati, seyyathīdaṁ: kāmāsavā bhavāsavā avijjāsavā.” ti [108]