Suttantapiṭake

Khuddakanikāyo

(paṭhamo gantho)

Khuddakapāṭhapāḷi

namo tassa bhagavato arahato sammāsambuddhassa

[BJT Page 002]

1: Saraṇagamanaṁ BJT note: Saraṇattayaṁ - ChS.01

buddhaṁ saraṇaṁ gacchāmi
dhammaṁ saraṇaṁ gacchāmi
saṅghaṁ saraṇaṁ gacchāmi

dutiyam-pi buddhaṁ saraṇaṁ gacchāmi
dutiyam-pi dhammaṁ saraṇaṁ gacchāmi
dutiyam-pi saṅghaṁ saraṇaṁ gacchāmi

tatiyam-pi buddhaṁ saraṇaṁ gacchāmi
tatiyam-pi dhammaṁ saraṇaṁ gacchāmi
tatiyam-pi saṅghaṁ saraṇaṁ gacchāmi

Saraṇagamanaṁ

 

2: Dasasikkhāpadaṁ

pāṇātipātā veramaṇīsikkhāpadaṁ samādiyāmi.
adinnādānā veramaṇīsikkhāpadaṁ samādiyāmi.
abrahmacariyā veramaṇīsikkhāpadaṁ samādiyāmi.
musāvādā veramaṇīsikkhāpadaṁ samādiyāmi.
surāmerayamajjapamādaṭṭhānā veramaṇīsikkhāpadaṁ samādiyāmi.
vikālabhojanā veramaṇīsikkhāpadaṁ samādiyāmi.
naccagītavāditavisūkadassanā veramaṇīsikkhāpadaṁ samādiyāmi.
mālāgandhavilepanadhāraṇamaṇḍanavibhūsanaṭṭhānā veramaṇīsikkhāpadaṁ samādiyāmi.
uccāsayanamahāsayanā veramaṇīsikkhāpadaṁ samādiyāmi.
jātarūparajatapaṭiggahaṇā veramaṇīsikkhāpadaṁ samādiyāmi.

Dasasikkhāpadaṁ

 

3: Dvattiṁsākāraṁ

[BJT page 004]

atthi imasmiṁ kāye:
kesā, lomā, nakhā, dantā, taco,
maṁsaṁ, nahārū, aṭṭhi, aṭṭhimiñjaṁ, BJT note: Aṭṭhimiñjā - seen somewhere.02 vakkaṁ,
hadayaṁ, yakanaṁ, kilomakaṁ, pihakaṁ, papphāsaṁ,
antaṁ, antaguṇaṁ, udariyaṁ, karīsaṁ,
pittaṁ, semhaṁ, pubbo, lohitaṁ, sedo, medo,
assu, vasā, khelo, siṅghānikā, lasikā, muttaṁ,
matthake matthaluṅgan-ti.

Dvattiṁsākāraṁ

 

4: Kumārapañhā

ekaṁ nāma kiṁ? BJT note: Eka nāma kiṁ? - in some books.03 sabbe sattā āhāraṭṭhitikā.
dve nāma kiṁ? nāmañ-ca rūpañ-ca.
tīṇi nāma kiṁ? tisso vedanā.
cattāri nāma kiṁ? cattāri ariyasaccāni.
pañca nāma kiṁ? pañcupādānakkhandhā.
cha nāma kiṁ? cha ajjhattikāni āyatanāni.
satta nāma kiṁ? satta bojjhaṅgā.
aṭṭha nāma kiṁ? ariyo aṭṭhaṅgiko maggo.
nava nāma kiṁ? nava sattāvāsā.
dasa nāma kiṁ? dasahaṅgehi samannāgato arahāti vuccatī ti.

Kumārapañhā

 

5: Maṅgalasuttaṁ

[BJT page 006]

evaṁ me sutaṁ:
ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme. atha kho aññatarā devatā abhikkantāya rattiyā, abhikkantavaṇṇā kevalakappaṁ jetavanaṁ obhāsetvā, yena bhagavā tenupasaṅkami, upasaṅkamitvā bhagavantaṁ abhivādetvā ekamantaṁ aṭṭhāsi. ekamantaṁ ṭhitā kho sā devatā bhagavantaṁ gāthāya ajjhabhāsi:

“bahū devā manussā ca ~ maṅgalāni acintayuṁ
ākaṅkhamānā sotthānaṁ: ~ brūhi maṅgalam-uttamaṁ.” [1]

“asevanā ca bālānaṁ, ~ paṇḍitānañ-ca sevanā,
pūjā ca pūjanīyānaṁ: ~ etaṁ maṅgalam-uttamaṁ. [2]

patirūpadesavāso ca, ~ pubbe ca katapuññatā,
attasammāpaṇidhi ca: ~ etaṁ maṅgalam-uttamaṁ. [3]

bāhusaccañ-ca sippañ-ca, ~ vinayo ca susikkhito,
subhāsitā ca yā vācā: ~ etaṁ maṅgalam-uttamaṁ. [4]

mātāpituupaṭṭhānaṁ, ~ puttadārassa saṅgaho,
anākulā ca kammantā: ~ etaṁ maṅgalam-uttamaṁ. [5]

dānañ-ca dhammacari yā ca, ~ ñātakānañ-ca saṅgaho,
anavajjāni kammāni: ~ etaṁ maṅgalam-uttamaṁ. [6]

ārati virati pāpā, ~ majjapānā ca saññamo,
appamādo ca dhammesu: Editor's note: BJT, dhammesū.04 ~ etaṁ maṅgalam-uttamaṁ. [7]

gāravo ca nivāto ca, ~ santuṭṭhī ca kataññutā,
kālena dhammasavaṇaṁ: ~ etaṁ maṅgalam-uttamaṁ. [8]

khantī ca sovacassatā, ~ samaṇānañ-ca dassanaṁ,
kālena dhammasākacchā: ~ etaṁ maṅgalam-uttamaṁ. [9]

tapo ca brahmacari yañ-ca, ~ ari yasaccānadassanaṁ,
nibbāṇa sacchikiri yā ca: ~ etaṁ maṅgalam-uttamaṁ. [10]

 [BJT page 008]

phuṭṭhassa lokadhammehi, ~ cittaṁ yassa na kampati,
asokaṁ virajaṁ khemaṁ: ~ etaṁ maṅgalam-uttamaṁ. [11]

etādisāni katvāna, ~ sabbattham-aparājitā,
sabbattha sotthiṁ gacchanti: ~ taṁ tesaṁ maṅgalam-uttaman”-ti. [12]

Maṅgalasuttaṁ

 

6: Ratanasuttaṁ

yānīdha bhūtāni samāgatāni,
bhummāni vā yāni va antaḷikkhe,
sabbe va bhūtā sumanā bhavantu,
atho pi sakkacca suṇantu bhāsitaṁ. [1]

tasmā hi bhūtā nisāmetha sabbe,
mettaṁ karotha mānusiyā pajāya,
divā ca ratto ca haranti ye baliṁ,
tasmā hi ne rakkhatha appamattā. [2]

yaṁ kiñci vittaṁ idha vā huraṁ vā
saggesu vā yaṁ ratanaṁ paṇītaṁ
na no samaṁ atthi tathāgatena
idam-pi buddhe ratanaṁ paṇītaṁ:
etena saccena suvatthi hotu! [3]

khayaṁ virāgaṁ amataṁ paṇītaṁ
yad-ajjhagā sakyamunī samāhito
na tena dhammena samatthi kiñci
idam-pi dhamme ratanaṁ Editor's note: BJT, ratna, by mistake.05 paṇītaṁ:
etena saccena suvatthi hotu! [4]

yam-buddhaseṭṭho parivaṇṇayī suciṁ
samādhim-ānantarikañ-ñam-āhu
samādhinā tena samo na vijjati
idam-pi dhamme ratanaṁ paṇītaṁ:
etena saccena suvatthi hotu! [5]

[BJT page 010]

ye puggalā aṭṭha satam-pasatthā
cattāri etāni yugāni honti
te dakkhiṇeyyā sugatassa sāvakā,
etesu dinnāni mahapphalāni
idam-pi saṅghe ratanaṁ paṇītaṁ:
etena saccena suvatthi hotu! [6]

ye suppayuttā manasā daḷhena
nikkāmino gotamasāsanamhi
te pattipattā amataṁ vigayha
laddhā mudhā nibbutiṁ bhuñjamānā
idam-pi saṅghe ratanaṁ paṇītaṁ:
etena saccena suvatthi hotu! [7]

yathindakhīlo paṭhaviṁ sito siyā
catubbhi vātebhi asampakampiyo,
tathūpamaṁ sappurisaṁ vadāmi,
yo ariyasaccāni avecca passati
idam-pi saṅghe ratanaṁ paṇītaṁ:
etena saccena suvatthi hotu! [8]

ye ariyasaccāni vibhāvayanti,
gambhīrapaññena sudesitāni,
kiñcāpi te honti bhusappamattā
na te bhavaṁ aṭṭhamam-ādiyanti
idam-pi saṅghe ratanaṁ paṇītaṁ:
etena saccena suvatthi hotu! [9]

[BJT page 012]

sahā vassa dassanasampadāya
tayassu dhammā jahitā bhavanti:
sakkāyadiṭṭhi vicikicchitañ-ca
sīlabbataṁ vā pi yad-atthi kiñci.
catūhapāyehi ca vippamutto,
cha cābhiṭhānāni abhabbŏ kātuṁ
idam-pi saṅghe ratanaṁ paṇītaṁ:
etena saccena suvatthi hotu! [10]

kiñcāpi so kammaṁ karoti pāpakaṁ
kāyena vācā uda cetasā vā,
abhabbŏ so tassa paṭicchādāya:
abhabbatā diṭṭhapadassa vuttā
idam-pi saṅghe ratanaṁ paṇītaṁ:
etena saccena suvatthi hotu! [11]

vanappagumbe yathā phussitagge
gimhāṇa māse paṭhamasmiṁ gimhe,
tathūpamaṁ dhammavaraṁ adesayī,
nibbāṇagāmiṁ paramaṁhitāya
idam-pi buddhe ratanaṁ paṇītaṁ:
etena saccena suvatthi hotu! [12]

varo varaññū varado varāharo,
anuttaro dhammavaraṁ adesayī
idam-pi buddhe ratanaṁ paṇītaṁ:
etena saccena suvatthi hotu! [13]

khīṇaṁ purāṇaṁ navaṁ natthi sambhavaṁ,
virattacittā āyatike bhavasmiṁ,
te khīṇabījā avirūḷhichandā,
nibbanti dhīrā yathāyam-padīpo
idam-pi saṅghe ratanaṁ paṇītaṁ:
etena saccena suvatthi hotu! [14]

[BJT page 014]

yānīdha bhūtāni samāgatāni,
bhummāni vā yāni va antaḷikkhe,
tathāgataṁ devamanussapūjitaṁ
buddhaṁ namassāma suvatthi hotu! [15]

yānīdha bhūtāni samāgatāni,
bhummāni vā yāni va antaḷikkhe,
tathāgataṁ devamanussapūjitaṁ
dhammaṁ namassāma suvatthi hotu! [16] Editor's note: BJT doesn't number the last two verses separately, presumably by mistake.06

yānīdha bhūtāni samāgatāni,
bhummāni vā yāni va antaḷikkhe,
tathāgataṁ devamanussapūjitaṁ
saṅghaṁ namassāma suvatthi hotu! [17]

Ratanasuttaṁ

 

7: Tirokuḍḍasuttaṁ

tirokuḍḍesu tiṭṭhanti, ~ sandhisiṅghāṭakesu ca,
dvārabāhāsu tiṭṭhanti, ~ āgantvāna sakaṁ gharaṁ. [1]

pahute annapānamhi, ~ khajjabhojje upaṭṭhite,
na tesaṁ koci sarati ~ sattānaṁ kammapaccayā. [2]

evaṁ dadanti ñātīnaṁ ~ ye honti anukampakā,
suciṁ paṇītaṁ kālena, ~ kappiyaṁ pānabhojanaṁ. [3]

“idaṁ vo ñātinaṁ hotu, ~ sukhitā hontu ñātayo!”
te ca tattha samāgantvā, ~ ñātipetā samāgatā, [4]

pahute annapānamhi, ~ sakkaccaṁ anumodare:
“ciraṁ jīvantu no ñātī! ~ yesaṁ hetu labhāmase,
amhākañ-ca katā pūjā, ~ dāyakā ca anipphalā!” [5]

na hi tattha kasī atthi, ~ gorakkhettha na vijjati,
vaṇijjā tādisī natthi, ~ hiraññena kayākkayaṁ.
ito dinnena yāpenti, ~ petā kālakatā tahiṁ. [6]

unname udakaṁ vaṭṭhaṁ,BJT note: vuṭṭhaṁ - palm leaf book.07 ~ yathā ninnaṁ pavattati,
evam-eva ito dinnaṁ, ~ petānaṁ upakappati.[7]

[BJT page 016]

yathā vārivahā pūrā ~ paripūrenti sāgaraṁ,
evam-eva ito dinnaṁ, ~ petānaṁ upakappati. [8]

“adāsi me, akāsi me, ~ ñātimittā sakhā ca me,”
petānaṁ dakkhiṇaṁ dajjā, ~ pubbe katamanussaraṁ. [9]

na hi runnaṁ va, soko vā, ~ yā caññā paridevanā,
na taṁ petānam-atthāya, ~ evaṁ tiṭṭhanti ñātayo. [10]

ayaṁ kho dakkhiṇā dinnā, ~ saṅghamhi suppatiṭṭhitā,
dīgharattaṁ hitāyassa, ~ ṭhānaso upakappati. [11]

so ñātidhammo ca ayaṁ nidassito
petānapūjā ca katā uḷārā,
balañ-ca bhikkhūnam-anuppadinnaṁ,
tumhehi puññaṁ pasutaṁ anappakaṁ! [12]

Tirokuḍḍasuttaṁ

 

8: Nidhikaṇḍasuttaṁ

nidhiṁ nidheti puriso ~ gambhīre odakantike:
“atthe kicce samuppanne ~ atthāya me bhavissati, [1]

rājato vā duruttassa, ~ corato pīḷitassa vā,
iṇassa vā pamokkhāya, ~ dubbhikkhe āpadāsu vā”.
etad-atthāya lokasmiṁ ~ nidhi nāma nidhīyati. [2]

tāva sunihito BJT note: tāvassunihito - in some books.08 santo ~ gambhīre odakantike,
na sabbo sabbadā eva Editor's note: BJT, eca, by mistake.10 ~ tassa taṁ upakappati,[3]

[BJT page 018]

nidhi vā ṭhānā cavati, ~ saññā vāssa vimuyhati,
nāgā vā apanāmenti, ~ yakkhā vā pi haranti naṁ, [4]

appiyā vā pi dāyādā ~ uddharanti apassato,
yadā puññakkhayo hoti ~ sabbam-etaṁ vinassati. [5]

yassa dānena sīlena, ~ saṁyamena damena ca,
nidhī sunihito hoti, ~ itthiyā purisassa Editor's note: BJT, purissa, an example of haplography.11 vā, [6]

cetiyamhi BJT note: Taṁ panetaṁ tividhaṁ hoti paribhogacetiyaṁ, uddissakacetiyaṁ, dhātucetiyan-ti. Tattha bodhirukkho paribhogacetiyaṁ, Buddhapaṭimā uddissakacetiyaṁ, dhātugabbhathupā sadhātukā dhātucetiyaṁ - commentary.12 va saṅghe vā, ~ puggale atithīsu vā,
mātari pitari vā pi, ~ atho jeṭṭhamhi bhātari, [7]

eso nidhī sunihito, ~ ajeyyo anugāmiko.
pahāya gamanīyesu, ~ etaṁ ādāya gacchati. [8] Editor's note: BJT prints numbers 8 & 9 in the wrong order.13

asādhāraṇam-aññesaṁ, ~ acoraharaṇo nidhi,
kayirātha dhīro puññāni, ~ yo nidhī anugāmiko. [9]

esa devamanussānaṁ ~ sabbakāmadado nidhi,
yaṁ yad-evābhipatthenti ~ sabbam-etena labbhati. [10]

suvaṇṇatā, sussaratā, ~ susaṇṭhānasurūpatā,
ādhipacca parivāraṁ, ~ sabbam-etena labbhati. [11]

padesarajjaṁ, issari yaṁ, ~ cakkavattisukham-piyaṁ,
devarajjam-pi dibbesu, ~ sabbam-etena labbhati. [12]

mānusikā ca sampatti, ~ devaloke ca yā rati,
yā ca nibbāṇasampatti, ~ sabbam-etena labbhati. [13]

mittasampadam-āgamma, ~ yoniso ca payuñjato,
vijjā vimutti vasībhāvo ~ sabbam-etena labbhati. [14]

 [BJT page 020]

paṭisambhidā, vimokkhā ca, ~ yā ca sāvakapāramī,
paccekabodhi, buddhabhūmi, ~ sabbam-etena labbhati. [15]

evaṁ mah'atthikā esā, ~ yad-idaṁ puññasampadā,
tasmā dhīrā pasaṁsanti ~ paṇḍitā katapuññataṁ. [16]

Nidhikaṇḍasuttaṁ .

 

9: Mettasuttaṁ

karaṇīyam-atthakusalena, ~ yan-taṁ santaṁ padaṁ abhisamecca:
sakko ujū ca sūjū ca, ~ suvaco cassa mudu anatimānī, [1]

santussako ca subharo ca, ~ appakicco ca sallahukavutti,
santindriyo ca nipako ca, ~ appagabbho kulesu ananugiddho, [2]

na ca khuddaṁ samācare kiñci ~ yena viññū pare upavadeyyuṁ.
“sukhino vā khemino hontu, ~ sabbe sattā bhavantu sukhitattā! [3]

ye keci pāṇabhūtatthi ~ tasā vā thāvarā vā anavasesā,
dīghā vā ye mahantā vā, ~ majjhimā rassakāṇukathūlā, [4]

diṭṭhā vā ye va addiṭṭhā, ~ ye ca dūre vasanti avidūre,
bhūtā vā sambhavesī vā ~ sabbe sattā bhavantu sukhitattā!” [5]

[BJT page 022]

na paro paraṁ nikubbetha, ~ nātimaññetha katthaci naṁ kañci,
byārosanā paṭighasaññā ~ nāññamaññassa dukkham-iccheyya. [6]

mātā yathā niyaṁ puttaṁ ~ āyusā ekaputtam-anurakkhe,
evam-pi sabbabhūtesu ~ mānasaṁ bhāvaye aparimāṇaṁ, [7]

mettañ-ca sabbalokasmiṁ ~ mānasaṁ bhāvaye aparimāṇaṁ,
uddhaṁ adho ca tiriyaṁ ca, ~ asambādhaṁ averaṁ asapattaṁ. [8]

tiṭṭhaṁ caraṁ nisinno vā, ~ sayāno vā yāvatassa vigatamiddho,
etaṁ satiṁ adiṭṭheyya, ~ brahmam-etaṁ vihāraṁ idha-m-āhu. [9]

diṭṭhiñ-ca anupagamma, ~ sīlavā dassanena sampanno,
kāmesu vineyya gedhaṁ, ~ na hi jātu gabbhaseyyaṁ puna-r-etī ti. [10]

Mettasuttaṁ

Khuddakapāṭhapāḷi Niṭṭhito

 

 

last updated: March 2006