Suttantapiṭake

Khuddakanikāyo
(dutiyo gantho)

Dhammapadapāḷi

namo tassa bhagavato arahato sammāsambuddhassa

1: Yamakavaggo

[BJT page 026]

manopubbaṅgamā dhammā, ~ manoseṭṭhā manomayā,
manasā ce paduṭṭhena ~ bhāsati vā karoti vā,
tato naṁ dukkham-anveti ~ cakkaṁ va vahato padaṁ. [1]

manopubbaṅgamā dhammā, ~ manoseṭṭhā manomayā,
manasā ce pasannena ~ bhāsati vā karoti vā,
tato naṁ sukham-anveti ~ chāyā va anapāyinī. [2]

“akkocchi maṁ avadhi maṁ ~ ajini maṁ ahāsi me”,
ye taṁ upanayhanti ~ veraṁ tesaṁ na sammati. [3]

“akkocchi maṁ avadhi maṁ ~ ajini maṁ ahāsi me”,
ye taṁ na upanayhanti ~ veraṁ tesūpasammati. [4]

na hi verena verāni ~ sammantīdha kudācanaṁ,
averena ca sammanti, ~ esa dhammo sanantano. [5]

pare ca na vijānanti ~ mayam-ettha yamāmase,
ye ca tattha vijānanti ~ tato sammanti medhagā. [6]

subhānupassiṁ viharantaṁ ~ indriyesu asaṁvutaṁ,
bhojanamhi amattaññuṁ, ~ kusītaṁ hīnavīriyaṁ,
taṁ ve pasahati māro ~ vāto rukkhaṁ va dubbalaṁ. [7]

[BJT page 028]

asubhānupassiṁ viharantaṁ ~ indriyesu susaṁvutaṁ,
bhojanamhi ca mattaññuṁ, ~ saddhaṁ āraddhavīriyaṁ,
taṁ ve nappasahati māro ~ vāto selaṁ va pabbataṁ. [8]

anikkasāvo kāsāvaṁ ~ yo vatthaṁ paridahessati,
apeto damasaccena ~ na so kāsāvam-arahati. [9]

yo ca vantakasāvassa ~ sīlesu susamāhito,
upeto damasaccena ~ sa ve kāsāvam-arahati. [10]

asāre sāramatino ~ sāre cāsāradassino,
te sāraṁ nādhigacchanti ~ micchāsaṁkappagocarā. [11]

sārañ-ca sārato ñatvā ~ asārañ-ca asārato,
te sāraṁ adhigacchanti ~ sammāsaṁkappagocarā. [12]

yathāgāraṁ ducchannaṁ ~ vuṭṭhi samativijjhati,
evaṁ abhāvitaṁ cittaṁ ~ rāgo samativijjhati. [13]

yathāgāraṁ succhannaṁ ~ vuṭṭhi na samativijjhati,
evaṁ subhāvitaṁ cittaṁ ~ rāgo na samativijjhati. [14]

idha socati pecca socati,
pāpakārī ubhayattha socati,
so socati so vihaññati
disvā kamma kiliṭṭham-attano. [15]

idha modati pecca modati,
katapuñño ubhayattha modati,
so modati so pamodati
disvā kammavisuddham-attano. [16]

idha tappati pecca tappati,
pāpakārī ubhayattha tappati,
“pāpaṁ me katan”-ti tappati,
bhiyyo tappati duggatiṁ gato. [17]

idha nandati pecca nandati,
katapuñño ubhayattha nandati,
“puññaṁ me katan”-ti nandati,
bhiyyo nandati suggatiṁ gato. [18]

[BJT page 030]

bahum-pi ce sahitaṁ bhāsamāno,
na takkaro hoti naro pamatto,
gopo va gāvo gaṇayaṁ paresaṁ,
na bhāgavā sāmaññassa hoti. [19]

appam-pi ce sahitaṁ bhāsamāno,
dhammassa hoti anudhammacārī,
rāgañ-ca dosañ-ca pahāya mohaṁ,
sammappajāno suvimuttacitto,
anupādiyāno idha vā huraṁ vā,
sa bhāgavā sāmaññassa hoti. [20]

Yamakavaggo paṭhamo.

 

 

last updated: March 2006