appamādo amatapadaṁ, ~ pamādo maccuno padaṁ,
appamattā na mīyanti, ~ ye pamattā yathā matā. [21]

etaṁ visesato ñatvā ~ appamādamhi paṇḍitā,
appamāde pamodanti, ~ arⁱyānaṁ gocare ratā. [22]

te jhāyino sātatikā, ~ niccaṁ daḷhaparakkamā,
phusanti dhīrā nibbāṇaṁ, ~ yogakkhemaṁ anuttaraṁ. [23]

uṭṭhānenappamādena ~ saṁyamena damena ca,
dīpaṁ kayⁱrātha medhāvī, ~ yaṁ ogho nābhikīrati. [25]

[BJT page 032]

pamādam-anuyuñjanti ~ bālā dummedhino janā,
appamādañ-ca medhāvī ~ dhanaṁ seṭṭhaṁ va rakkhati. [26]

mā pamādam-anuyuñjetha ~ mā kāmaratisanthavaṁ,
appamatto hi jhāyanto ~ pappoti vipulaṁ sukhaṁ. [27]

pamādaṁ appamādena ~ yadā nudati paṇḍito,
paññāpāsādam-āruyha, ~ asoko sokiniṁ pajaṁ,
pabbataṭṭho va bhummaṭṭhe ~ dhīro bāle avekkhati. [28]

appamatto pamattesu, ~ suttesu bahujāgaro,
abalassaṁ va sīghasso ~ hitvā yāti sumedhaso. [29]

appamādena maghavā ~ devānaṁ seṭṭhataṁ gato,
appamādaṁ pasaṁsanti, ~ pamādo garahito sadā. [30]

appamādarato bhikkhu, ~ pamāde bhayadassivā,
saṁyojanaṁ aṇuṁ-thūlaṁ ~ ḍahaṁ aggī va gacchati. [31]

appamādarato bhikkhu, ~ pamāde bhayadassivā,
abhabbo parihāṇāya, ~ nibbāṇasseva santike. [32]