phandanaṁ capalaṁ cittaṁ ~ durakkhaṁ dunnivārayaṁ,
ujuṁ karoti medhāvī ~ usukāro va tejanaṁ. [33]

vārijo va thale khitto ~ okam-okata' ubbhato,
pariphandatidaṁ cittaṁ ~ māradheyyaṁ pahātave. [34]

dunniggahassa lahuno ~ yatthakāmanipātino,
cittassa damatho sādhu, ~ cittaṁ dantaṁ sukhāvahaṁ. [35]

sududdasaṁ sunipunaṁ ~ yatthakāmanipātinaṁ,
cittaṁ rakkhetha medhāvī, ~ cittaṁ guttaṁ sukhāvahaṁ. [36]

dūraṅgamaṁ ekacaraṁ ~ asarīraṁ guhāsayaṁ,
ye cittaṁ saññam-essanti ~ mokkhanti mārabandhanā. [37]

anavaṭṭhitacittassa ~ saddhammaṁ avijānato,
paripalavapasādassa ~ paññā na paripūrati. [38]

anavassutacittassa ~ ananvāhatacetaso,
puññapāpapahīṇassa ~ natthi jāgarato bhayaṁ. [39]

aciraṁ vatayaṁ kāyo ~ paṭhaviṁ adhisessati,
chuddho apetaviññāṇo ~ niratthaṁ va kaliṅgaraṁ. [41]

diso disaṁ yantaṁ kayⁱrā ~ verī vā pana verinaṁ
micchāpaṇihitaṁ cittaṁ ~ pāpiyo naṁ tato kare. [42]

[BJT page 036]

na taṁ mātā pitā kayⁱrā ~ aññe vā pi ca ñātakā
sammāpaṇihitaṁ cittaṁ ~ seyyaso naṁ tato kare. [43]