Dhammapadapāḷi

7. Arahantavaggo

 

gataddhino visokassa ~ vippamuttassa sabbadhi,
sabbaganthappahīṇassa ~ pariḷāho na vijjati. [90]

uyyuñjanti satimanto, ~ na nikete ramanti te,
haṁsā va pallalaṁ hitvā ~ okam-okaṁ jahanti te. [91]

yesaṁ sannicayo natthi, ~ ye pariññātabhojanā,
suññato animitto ca ~ vimokkho yesa' gocaro,
ākāse va sakuntānaṁ ~ gati tesaṁ durannayā. [92]

yassāsavā parikkhīṇā ~ āhāre ca anissito,
suññato animitto ca ~ vimokkho yassa gocaro,
ākāse va sakuntānaṁ ~ padaṁ tassa durannayaṁ [93]

yassindriyāni samathaṁ gatāni,
assā yathā sārathinā sudantā,
pahīṇamānassa anāsavassa,
devā pi tassa pihayanti tādino. [94]

paṭhavisamo no virujjhati,
indakhīlūpamo tādi subbato,
rahado va apetakaddamo,
saṁsārā na bhavanti tādino. [95]

[BJT page 046]

santaṁ tassa manaṁ hoti, ~ santā vācā ca kamma ca,
sammad-aññāvimuttassa, ~ upasantassa tādino. [96]

assaddho akataññū ca ~ sandhicchedo ca yo naro,
hatāvakāso vantāso ~ sa ve uttamaporiso. [97]

gāme vā yadi vāraññe, ~ ninne vā yadi vā thale,
yatthārahanto viharanti ~ taṁ bhūmiṁ rāmaṇeyyakaṁ. [98]

ramaṇīyāni araññāni, ~ yattha na ramatī jano,
vītarāgā ramissanti, ~ na te kāmagavesino. [99]

Arahantavaggo sattamo.

 

 

last updated: March 2006