Dhammapadapāḷi

8. Sahassavaggo

 

sahassam-api ce vācā ~ anatthapadasaṁhitā,
ekaṁ atthapadaṁ seyyo ~ yaṁ sutvā upasammati. [100]

sahassam-api ce gāthā ~ anatthapadasaṁhitā,
ekaṁ gāthāpadaṁ seyyo ~ yaṁ sutvā upasammati. [101]

yo ce gāthāsataṁ bhāse ~ anatthapadasaṁhitā Editor's note: BJT, anatthapadasaṁhitaṁ, by mistake.01
ekaṁ dhammapadaṁ seyyo ~ yaṁ sutvā upasammati. [102]

[BJT page 048]

yo sahassaṁ sahassena ~ saṅgāme mānuse jine,
ekañ-ca jeyya attānaṁ ~ sa ve saṅgāmajuttamo. [103]

attā have jitaṁ seyyo ~ yā cāyaṁ itarā pajā
attadantassa posassa, ~ niccaṁ saññatacārino. [104]

neva devo na gandhabbo, ~ na māro saha brahmunā,
jitaṁ apajitaṁ kayirā ~ tathārūpassa jantuno. [105]

māse māse sahassena ~ yo yajetha sataṁ samaṁ,
ekañ-ca bhāvitattānaṁ ~ muhuttam-api pūjaye,
sā yeva pūjanā seyyā ~ yañ-ce vassasataṁ hutaṁ. [106]

yo ca vassasataṁ jantu ~ aggiṁ paricare vane,
ekañ-ca bhāvitattānaṁ ~ muhuttam-api pūjaye,
sā yeva pūjanā seyyā ~ yañ-ce vassasataṁ hutaṁ. [107]

yaṁ kiñci yiṭṭhaṁ va hutaṁ va loke,
saṁvaccharaṁ yajetha puññapekkho,
sabbam-pi taṁ na catubhāgam-eti,
abhivādanā ujjugatesu seyyā. [108]

abhivādanasīlissa ~ niccaṁ vaddhāpacāyino,
cattāro dhammā vaḍḍhanti: ~ āyu vaṇṇo sukhaṁ balaṁ. [109]

[BJT page 050]

yo ca vassasataṁ jīve ~ dussīlo asamāhito,
ekāhaṁ jīvitaṁ seyyo ~ sīlavantassa jhāyino. [110]

yo ca vassasataṁ jīve ~ duppañño asamāhito,
ekāhaṁ jīvitaṁ seyyo ~ paññavantassa jhāyino. [111]

yo ce vassasataṁ jīve ~ kusīto hīnavīriyo,
ekāhaṁ jīvitaṁ seyyo ~ viriyam-ārabhato daḷhaṁ. [112]

yo ce vassasataṁ jīve ~ apassaṁ udayavyayaṁ,
ekāhaṁ jīvitaṁ seyyo ~ passato udayavyayaṁ. [113]

yo ce vassasataṁ jīve ~ apassaṁ amataṁ padaṁ,
ekāhaṁ jīvitaṁ seyyo ~ passato amataṁ padaṁ. [114]

yo ca vassasataṁ jīve ~ apassaṁ dhammam-uttamaṁ,
ekāhaṁ jīvitaṁ seyyo ~ passato dhammam-uttamaṁ. [115]

Sahassavaggo aṭṭhamo.

 

 

last updated: March 2006