Dhammapadapāḷi

9. Pāpavaggo

 

abhitvaretha BJT Note: abhittharetha - in many books.01 kalyāṇe, ~ pāpā cittaṁ nivāraye,
dandhaṁ hi karoto puññaṁ ~ pāpasmiṁ ramatī mano. [116]

[BJT page 052]

pāpaṁ ce puriso kayirā, ~ na taṁ kayirā punappunaṁ,
na tamhi chandaṁ kayirātha, ~ dukkho pāpassa uccayo. [117]

puññaṁ ce puriso kayirā, ~ kayirāthetaṁ punappunaṁ,
tamhi chandaṁ kayirātha, ~ sukho puññassa uccayo. [118]

pāpo pi passati bhadraṁ ~ yāva pāpaṁ na paccati,
yadā ca paccati pāpaṁ ~ atha pāpo pāpāni passati. [119]

bhadro pi passati pāpaṁ ~ yāva bhadraṁ na paccati,
yadā ca paccati bhadraṁ ~ atha bhadro bhadrāni passati. [120]

māpamaññetha pāpassa ~ “na maṁ taṁ Editor's note: BJT actually prints mantaṁ here, but maṁ taṁ in the next verse. PTS: man taṁ.02 āgamissati”.
udabindunipātena ~ udakumbho pi pūrati,
pūrati bālo pāpassa, ~ thokathokam-pi ācinaṁ. [121]

māpamaññetha puññassa ~ “na maṁ taṁ āgamissati”.
udabindunipātena ~ udakumbho pi pūrati,
pūrati dhīro puññassa, ~ thokathokam-pi ācinaṁ. [122]

[BJT page 054]

vāṇijo va bhayaṁ maggaṁ ~ appasattho mahaddhano,
visaṁ jīvitukāmo va, ~ pāpāni parivajjaye. [123]

pāṇimhi ce vaṇo nāssa ~ hareyya pāṇinā visaṁ,
nābbaṇaṁ visam-anveti, ~ natthi pāpaṁ akubbato. [124]

yo appaduṭṭhassa narassa dussati,
suddhassa posassa anaṅgaṇassa,
tam-eva bālaṁ pacceti pāpaṁ
sukhumo rajo paṭivātaṁ va khitto. [125]

gabbham-ekepapajjanti ~ nirayaṁ pāpakammino,
saggaṁ sugatino yanti ~ parinibbanti anāsavā. [126]

na antalikkhe, na samuddamajjhe,
na pabbatānaṁ vivaraṁ pavissa,
na vijjatī so jagatippadeso
yatthaṭṭhito mucceyya pāpakammā. [127]

na antalikkhe, na samuddamajjhe,
na pabbatānaṁ vivaraṁ pavissa,
na vijjatī Editor's note: BJT prints vijjati here, but vijjatī, as is required by the metre, in the previous verse.03 so jagatippadeso
yatthaṭṭhitaṁ nappasahetha maccu. [128]

Pāpavaggo navamo.

 

 

last updated: March 2006