Dhammapadapali - BJT - 10

sabbe tasanti daṇḍassa, ~ sabbe bhāyanti maccuno,
attānaṁ upamaṁ katvā, ~ na haneyya na ghātaye. [129]

sabbe tasanti daṇḍassa, ~ sabbesaṁ jīvitaṁ piyaṁ,
attānaṁ upamaṁ katvā, ~ na haneyya na ghātaye. [130]

sukhakāmāni bhūtāni ~ yo daṇḍena vihiṁsati,
attano sukham-esāno ~ pecca so na labhate sukhaṁ. [131]

sukhakāmāni bhūtāni ~ yo daṇḍena na hiṁsati,
attano sukham-esāno ~ pecca so labhate sukhaṁ. [132]

māvoca pharusaṁ kañci, ~ vuttā paṭivadeyyu' taṁ,
dukkhā hi sārambhakathā, ~ paṭidaṇḍā phuseyyu' taṁ. [133]

sace neresi attānaṁ, ~ kaṁso upahato yathā,
esa pattosi nibbāṇaṁ, ~ sārambho te na vijjati. [134]

yathā daṇḍena gopālo ~ gāvo pāceti gocaraṁ,
evaṁ jarā ca maccu ca ~ āyuṁ pācenti pāṇinaṁ. [135]

atha pāpāni kammāni ~ karaṁ bālo na bujjhati,
sehi kammehi dummedho ~ aggidaḍḍho va tappati. [136]

[BJT page 058]

yo daṇḍena adaṇḍesu ~ appaduṭṭhesu dussati
dasannam-aññataraṁ ṭhānaṁ ~ khippam-eva nigacchati: [137]

vedanaṁ pharusaṁ jāniṁ, ~ sarīrassa ca bhedanaṁ,
garukaṁ vāpi ābādhaṁ, ~ cittakkhepaṁ va pāpuṇe, [138]

rājato vā upassaggaṁ, ~ abbhakkhānaṁ va dāruṇaṁ,
parikkhayaṁ va ñātīnaṁ, ~ bhogānaṁ va pabhaṅguraṁ. [139]

atha vāssa agārāni, ~ aggi ḍahati pāvako.
kāyassa bhedā duppañño ~ nirayaṁ so upapajjati. [140]

na naggacariyā na jaṭā na paṅkā,
nānāsikā thaṇḍilasāyikā vā,
rājo ca jallaṁ ukkuṭikappadhānaṁ,
sodhenti maccaṁ avitiṇṇakaṅkhaṁ. [141]

alaṅkato ce pi samaṁ careyya,
santo danto niyato brahmacārī,
sabbesu bhūtesu nidhāya daṇḍaṁ,
so brāhmaṇo so samaṇo sa bhikkhu. [142]

[BJT page 060]

hirīnisedho puriso ~ koci lokasmiṁ vijjati,
yo nindaṁ apabodhati ~ asso bhadro kasām-iva. [143]

asso yathā bhadro kasāniviṭṭho
ātāpino saṁvegino bhavātha.
saddhāya sīlena ca vīriyena ca,
samādhinā dhammavinicchayena ca,
sampannavijjācaraṇā patissatā,
pahassatha dukkham-idaṁ anappakaṁ. [144]

udakaṁ hi nayanti nettikā,
usukārā namayanti tejanaṁ,
dāruṁ namayanti tacchakā,
attānaṁ damayanti subbatā. [145]