Dhammapadapāḷi

11. Jarāvaggo

 

ko nu hāso kim-ānando ~ niccaṁ pajjalite sati?
andhakārena onaddhā ~ padīpaṁ na gavessatha? [146]

passa cittakataṁ bimbaṁ ~ arukāyaṁ samussitaṁ
āturaṁ bahusaṅkappaṁ ~ yassa natthi dhuvaṁ ṭhiti. [147]

[BJT page 062]

parijiṇṇam-idaṁ rūpaṁ ~ roganiḍḍhaṁ pabhaṅguraṁ,
bhijjati pūtisandeho ~ maraṇantaṁ hi jīvitaṁ. [148]

yānimāni apatthāni ~ alāpūneva sārade,
kāpotakāni aṭṭhīni ~ tāni disvāna kā rati? [149]

aṭṭhīnaṁ nagaraṁ kataṁ ~ maṁsalohitalepanaṁ,
yattha jarā ca maccu ca ~ māno makkho ca ohito. [150]

jīranti ve rājarathā sucittā,
atho sarīram-pi jaraṁ upeti.
satañ-ca dhammo na jaraṁ upeti,
santo have sabbhi pavedayanti. [151]

appassutāyaṁ puriso ~ balivaddo va jīrati,
maṁsāni tassa vaḍḍhanti, ~ paññā tassa na vaḍḍhati. [152]

anekajātisaṁsāraṁ ~ sandhāvissaṁ anibbisaṁ
gahakārakaṁ gavesanto: ~ dukkhā jāti punappunaṁ. [153]

[BJT page 064]

gahakāraka diṭṭhosi! ~ puna gehaṁ na kāhasi:
sabbā te phāsukā bhaggā, ~ gahakūṭaṁ visaṅkhitaṁ,
visaṅkhāragataṁ cittaṁ, ~ taṇhānaṁ khayam-ajjhagā. [154]

acaritvā brahmacariyaṁ ~ aladdhā yobbane dhanaṁ
jiṇṇakoñcā va jhāyanti ~ khīṇamacche va pallale. [155]

acaritvā brahmacariyaṁ ~ aladdhā yobbane dhanaṁ
senti cāpātikhittā va ~ purāṇāni anutthunaṁ. [156]

Jarāvaggo ekādasamo.

 

 

last updated: August 2010