Dhammapadapāḷi

13. Lokavaggo

 

hīnaṁ dhammaṁ na seveyya, ~ pamādena na saṁvase,
micchādiṭṭhiṁ na seveyya, ~ na siyā lokavaddhano. [167]

uttiṭṭhe nappamajjeyya, ~ dhammaṁ sucaritaṁ care,
dhammacārī Editor's note: BJT, dhammacāri, but cf. the next verse.01 sukhaṁ seti ~ asmiṁ loke paramhi ca. [168]

[BJT page 068]

dhammaṁ care sucaritaṁ, ~ na naṁ duccaritaṁ care,
dhammacārī sukhaṁ seti ~ asmiṁ loke paramhi ca. [169]

yathā bubbulakaṁ passe, ~ yathā passe marīcikaṁ,
evaṁ lokaṁ avekkhantaṁ ~ maccurājā na passati. [170]

etha passathimaṁ lokaṁ ~ cittaṁ rājarathūpamaṁ
yattha bālā visīdanti, ~ natthi saṅgo vijānataṁ. [171]

yo ca pubbe pamajjitvā ~ pacchā so nappamajjati,
so imaṁ lokaṁ pabhāseti ~ abbhā mutto va candimā. [172]

yassa pāpaṁ kataṁ kammaṁ ~ kusalena pithīyati,
so imaṁ lokaṁ pabhāseti ~ abbhā mutto va candimā. [173]

andhabhūto ayaṁ loko, ~ tanukettha vipassati,
sakunto jālamutto va ~ appo saggāya gacchati. [174]

haṁsādiccapathe yanti, ~ ākāse yanti iddhiyā,
niyyanti dhīrā lokamhā ~ jetvā māraṁ savāhiniṁ. [175]

ekaṁ dhammaṁ atītassa ~ musāvādissa jantuno Editor's note: BJT, jantūno, printer's error.02
vitiṇṇaparalokassa ~ natthi pāpaṁ akāriyaṁ. [176]

[BJT page 070]

na ve kadariyā devalokaṁ vajanti,
bālā have nappasaṁsanti dānaṁ,
dhīro ca dānaṁ anumodamāno,
teneva so hoti sukhī Editor's note: BJT, sūkhī, printer's error.03 parattha. [177]

pathavyā ekarajjena ~ saggassa gamanena vā
sabbalokādhipaccena ~ sotāpattiphalaṁ varaṁ. [178]

Lokavaggo terasamo.

 

 

last updated: March 2006