kodhaṁ jahe vippajaheyya mānaṁ
saṁyojanaṁ sabbam-atikkameyya
taṁ nāmarūpasmiṁ asajjamānaṁ
akiñcanaṁ nānupatanti dukkhā. [221]

yo ve uppatitaṁ kodhaṁ ~ rathaṁ bhantaṁ va dhāraye,
tam-ahaṁ sārathiṁ brūmi ~ rasmiggāho itaro jano. [222]

[BJT page 082]

akkodhena jine kodhaṁ, ~ asādhuṁ sādhunā jine,
jine kadarⁱyaṁ dānena, ~ saccena alikavādinaṁ. [223]

saccaṁ bhaṇe na kujjheyya, ~ dajjāppasmim-pi yācito,
etehi tīhi ṭhānehi ~ gacche devāna' santike. [224]

ahiṁsakā ye munayo, ~ niccaṁ kāyena saṁvutā,
te yanti accutaṁ ṭhānaṁ, ~ yattha gantvā na socare. [225]

sadā jāgaramānānaṁ ~ ahorattānusikkhinaṁ,
nibbāṇaṁ adhimuttānaṁ, ~ atthaṁ gacchanti āsavā. [226]

porāṇam-etaṁ atula ~ netaṁ ajjatanām-iva,
nindanti tuṇhim-āsīnaṁ, ~ nindanti bahubhāṇinaṁ,
mitabhāṇim-pi nindanti, ~ natthi loke anindito. [227]

na cāhu na ca bhavissati ~ na cetarahi vijjati
ekantaṁ nindito poso ~ ekantaṁ vā pasaṁsito. [228]

yañ-ce viññū pasaṁsanti, ~ anuvicca suve suve,
acchiddavuttiṁ medhāviṁ, ~ paññāsīlasamāhitaṁ, [229]

nekkhaṁ jambonadasseva, ~ ko taṁ ninditum-ar^ahati?
devā pi naṁ pasaṁsanti, ~ brahmunā pi pasaṁsito. [230]

kāyappakopaṁ rakkheyya, ~ kāyena saṁvuto siyā,
kāyaduccaritaṁ hitvā ~ kāyena sucaritaṁ care. [231]

vacīpakopaṁ rakkheyya, ~ vācāya saṁvuto siyā,
vacīduccaritaṁ hitvā ~ vācāya sucaritaṁ care. [232]

manopakopaṁ rakkheyya, ~ manasā saṁvuto siyā,
manoduccaritaṁ hitvā ~ manasā sucaritaṁ care. [233]

[BJT page 084]

kāyena saṁvutā dhīrā, ~ atho vācāya saṁvutā,
manasā saṁvutā dhīrā, ~ te ve suparisaṁvutā. [234]