Dhammapadapāḷi

18. Malavaggo

 

paṇḍupalāso va dānisi,
yamapurisā pi ca taṁ upaṭṭhitā,
uyyogamukhe ca tiṭṭhasi,
pātheyyam-pi ca te na vijjati. [235]

so karohi dīpam-attano,
khippaṁ vāyama paṇḍito bhava,
niddhantamalo anaṅgaṇo,
dibbaṁ ariyabhūmim-ehisi. [236]

upanītavayo ca dānisi,
sampayātosi yamassa santike,
vāso pi ca te natthi antarā,
pātheyyam-pi ca te na vijjati. [237]

so karohi dīpam-attano,
khippaṁ vāyama paṇḍito bhava,
niddhantamalo anaṅgaṇo,
na puna jātijaraṁ upehisi. [238]

anupubbena medhāvī ~ thokathokaṁ khaṇe khaṇe,
kammāro rajatasseva ~ niddhame malam-attano. [239]

ayasā va malaṁ samuṭṭhitaṁ,
taduṭṭhāya tam-eva khādati,
evaṁ atidhonacārinaṁ
sakakammāni nayanti duggatiṁ. [240]

asajjhāyamalā mantā, ~ anuṭṭhānamalā gharā,
malaṁ vaṇṇassa kosajjaṁ, ~ pamādo rakkhato malaṁ. [241]

malitthiyā duccaritaṁ, ~ maccheraṁ dadato malaṁ,
malā ve pāpakā dhammā ~ asmiṁ loke paramhi ca. [242]

[BJT page 086]

tato malā malataraṁ, ~ avijjā paramaṁ malaṁ,
etaṁ malaṁ pahatvāna ~ nimmalā hotha bhikkhavo. [243]

sujīvaṁ ahirikena ~ kākasūrena dhaṁsinā,
pakkhandinā pagabbhena, ~ saṁkiliṭṭhena jīvitaṁ. [244]

hirimatā ca dujjīvaṁ, ~ niccaṁ sucigavesinā,
alīnenāpagabbhena, ~ suddhājīvena passatā. [245]

yo pāṇam-atipāteti, ~ musāvādañ-ca bhāsati,
loke adinnaṁ ādiyati, ~ paradārañ-ca gacchati, [246]

surāmerayapānañ-ca ~ yo naro anuyuñjati,
idheva poso lokasmiṁ ~ mūlaṁ khaṇati attano. [247]

evam-bho purisa jānāhi ~ pāpadhammā asaññatā.
mā taṁ lobho adhammo ca ~ ciraṁ dukkhāya randhayuṁ. [248]

dadāti ve yathāsaddhaṁ ~ yathāpasādanaṁ jano,
tattha ve maṅku yo hoti ~ paresaṁ pānabhojane
na so divā vā rattiṁ vā ~ samādhiṁ adhigacchati. [249]

yassa cetaṁ samucchinnaṁ ~ mūlaghaccaṁ samūhataṁ,
sa ve divā vā rattiṁ vā ~ samādhiṁ adhigacchati. [250]

natthi rāgasamo aggi, ~ natthi dosasamo gaho,
natthi mohasamaṁ jālaṁ, ~ natthi taṇhāsamā nadī. [251]

sudassaṁ vajjam-aññesaṁ, ~ attano pana duddasaṁ,
paresaṁ hi so vajjāni ~ opuṇāti yathā bhusaṁ, Editor's note: BJT, bhūsaṁ, printer's error.01
attano pana chādeti ~ kaliṁ va kitavā saṭho. [252]

paravajjānupassissa ~ niccaṁ ujjhānasaññino
āsavā tassa vaḍḍhanti, ~ ārā so āsavakkhayā. [253]

[BJT page 088]

ākāse padaṁ natthi, ~ samaṇo natthi bāhire,
papañcābhiratā pajā, ~ nippapañcā tathāgatā. [254]

ākāse padaṁ natthi, ~ samaṇo natthi bāhire,
saṅkhārā sassatā natthi, ~ natthi buddhānaṁ iñjitaṁ. [255]

Malavaggo aṭṭhārasamo.

 

 

last updated: August 2010