na tena hoti dhammaṭṭho ~ yenatthaṁ sahasā naye,
yo ca atthaṁ anatthañ-ca ~ ubho niccheyya paṇḍito, [256]

asāhasena dhammena ~ samena nayatī pare,
dhammassa gutto medhāvī ~ dhammaṭṭho ti pavuccati. [257]

na tena paṇḍito hoti ~ yāvatā bahu bhāsati,
khemī averī abhayo ~ paṇḍito ti pavuccati. [258]

na tāvatā dhammadharo ~ yāvatā bahu bhāsati,
yo ca appam-pi sutvāna ~ dhammaṁ kāyena passati,
sa ve dhammadharo hoti ~ yo dhammaṁ nappamajjati. [259]

na tena thero hoti ~ yenassa palitaṁ siro,
paripakko vayo tassa ~ moghajiṇṇo ti vuccati. [260]

[BJT page 090]

yamhi saccañ-ca dhammo ca ~ ahiṁsā saṁyamo damo,
sa ve vantamalo dhīro ~ thero iti pavuccati. [261]

na vākkaraṇamattena ~ vaṇṇapokkharatāya vā
sādhurūpo naro hoti ~ issukī maccharī saṭho. [262]

yassa cetaṁ Editor's note: BJT prints ce taṁ, printer's error.⁰¹ samucchinnaṁ ~ mūlaghaccaṁ samūhataṁ
sa vantadoso medhāvī ~ sādhurūpo ti vuccati. [263]

na muṇḍakena samaṇo ~ abbato alikaṁ bhaṇaṁ
icchālobhasamāpanno ~ samaṇo kiṁ bhavissati. [264]

yo ca sameti pāpāni, ~ aṇuṁ-thūlāni sabbaso,
samitattā hi pāpānaṁ ~ samaṇo ti pavuccati. [265]

na tena bhikkhu Editor's note: BJT, bhikkhū, which is also the reading in the commentary, but the grammar demands a singular here.⁰² hoti ~ yāvatā bhikkhate pare,
vissaṁ dhammaṁ samādāya ~ bhikkhu hoti na tāvatā. [266]

yodha puññañ-ca pāpañ-ca ~ bāhetvā brahmacarⁱyavā,
saṅkhāya loke carati, ~ sa ce bhikkhū ti vuccati. [267]

na monena muni hoti ~ mūḷharūpo aviddasu,
yo ca tulaṁ va paggayha ~ varam-ādāya paṇḍito, [268]

[BJT page 092]

pāpāni parivajjeti, ~ sa munī tena so muni,
yo munāti ubho loke ~ muni tena pavuccati. [269]

na tena ariyo hoti ~ yena pāṇāni hiṁsati,
ahiṁsā sabbapāṇānaṁ ~ ariyo ti pavuccati. [270]

na sīlabbatamattena, ~ bāhusaccena vā pana,
atha vā samādhilābhena, ~ viviccasayanena vā, [271]

phusāmi nekkhammasukhaṁ, ~ aputhujjanasevitaṁ,
bhikkhu vissāsaṁ māpādi ~ appatto āsavakkhayaṁ. [272]