Dhammapadapāḷi

20. Maggavaggo

 

maggānaṭṭhaṅgiko seṭṭho, ~ saccānaṁ caturo padā,
virāgo seṭṭho dhammānaṁ, ~ dvipadānañ-ca cakkhumā. [273]

eso va maggo natthañño ~ dassanassa visuddhiyā,
etaṁ hi tumhe paṭipajjatha, ~ mārassetaṁ pamohanaṁ. [274]

etaṁ hi tumhe paṭipannā ~ dukkhassantaṁ karissatha,
akkhāto ve mayā maggo ~ aññāya sallasatthanaṁ. [275]

[BJT page 094]

tumhehi kiccaṁ ātappaṁ ~ akkhātāro tathāgatā,
paṭipannā pamokkhanti ~ jhāyino mārabandhanā. [276]

“sabbe saṅkhārā aniccā” ti, ~ yadā paññāya passati,
atha nibbindati dukkhe ~ - esa maggo visuddhiyā. [277]

“sabbe saṅkhārā dukkhā” ti, ~ yadā paññāya passati,
atha nibbindati dukkhe ~ - esa maggo visuddhiyā. [278]

“sabbe dhammā anattā” ti, ~ yadā paññāya passati,
atha nibbindati dukkhe ~ - esa maggo visuddhiyā. [279]

uṭṭhānakālamhi anuṭṭhahāno,
yuvā balī ālasiyaṁ upeto,
saṁsannasaṅkappamano kusīto,
paññāya maggaṁ alaso na vindati. [280]

vācānurakkhī manasā susaṁvuto,
kāyena ca akusalaṁ na kayirā,
ete tayo kammapathe visodhaye,
ārādhaye maggaṁ isippaveditaṁ. [281]

yogā ve jāyati bhūri, ~ ayogā bhūrisaṅkhayo,
etaṁ dvedhāpathaṁ ñatvā ~ bhavāya vibhavāya ca,
tathattānaṁ niveseyya ~ yathā bhūri pavaḍḍhati. [282]

[BJT page 096]

vanaṁ chindatha mā rukkhaṁ, ~ vanato jāyatī bhayaṁ,
chetvā vanañ-ca vanathañ-ca, ~ nibbanā hotha bhikkhavo. [283]

yāvaṁ vanatho na chijjati
anumatto pi narassa nārisu
paṭibaddhamano va tāva so,
vaccho khīrapako va mātari. [284]

ucchinda sineham-attano,
kumudaṁ sāradikaṁ va pāṇinā
santimaggam-eva brūhaya
nibbāṇaṁ sugatena desitaṁ. [285]

“idha vassaṁ vasissāmi, ~ idha hemantagimhisu”,
iti bālo vicinteti ~ antarāyaṁ na bujjhati. [286]

taṁ puttapasusammattaṁ ~ byāsattamanasaṁ naraṁ,
suttaṁ gāmaṁ mahogho va ~ maccu ādāya gacchati. [287]

na santi puttā tāṇāya, ~ na pitā na pi bandhavā,
antakenādhipannassa, ~ natthi ñātisu tāṇatā. [288]

etam-atthavasaṁ ñatvā, ~ paṇḍito sīlasaṁvuto,
nibbāṇagamanaṁ maggaṁ ~ khippam-eva visodhaye. [289]

Maggavaggo vīsatimo.

 

 

last updated: March 2006