Dhammapadapāḷi

21. Pakiṇṇakavaggo

 

mattāsukhapariccāgā ~ passe ce vipulaṁ sukhaṁ,
caje mattāsukhaṁ dhīro ~ sampassaṁ vipulaṁ sukhaṁ. [290]

paradukkhūpadānena ~ attano sukham-icchati,
verasaṁsaggasaṁsaṭṭho ~ verā so na parimuccati. [291]

yaṁ hi kiccaṁ tad-apaviddhaṁ, ~ akiccaṁ pana kayirati,
unnalānaṁ pamattānaṁ ~ tesaṁ vaḍḍhanti āsavā. [292]

yesañ-ca susamāraddhā ~ niccaṁ kāyagatā sati,
akiccaṁ te na sevanti ~ kicce sātaccakārino,
satānaṁ sampajānānaṁ ~ atthaṁ gacchanti āsavā. [293]

mātaraṁ pitaraṁ hantvā, ~ rājāno dve ca khattiye,
raṭṭhaṁ sānucaraṁ hantvā, ~ anīgho yāti brāhmaṇo. [294]

mātaraṁ pitaraṁ hantvā, ~ rājāno dve ca sottiye,
veyyagghapañcamaṁ hantvā, ~ anīgho yāti brāhmaṇo. [295]

suppabuddhaṁ pabujjhanti ~ sadā gotamasāvakā,
yesaṁ divā ca ratto ca ~ niccaṁ buddhagatā sati. [296]

suppabuddhaṁ pabujjhanti ~ sadā gotamasāvakā,
yesaṁ divā ca ratto ca ~ niccaṁ dhammagatā sati. [297]

suppabuddhaṁ pabujjhanti ~ sadā gotamasāvakā,
yesaṁ divā ca ratto ca ~ niccaṁ saṅghagatā sati. [298]

suppabuddhaṁ pabujjhanti ~ sadā gotamasāvakā,
yesaṁ divā ca ratto ca ~ niccaṁ kāyagatā sati. [299]

suppabuddhaṁ pabujjhanti ~ sadā gotamasāvakā,
yesaṁ divā ca ratto ca ~ ahiṁsāya rato mano. [300]

[BJT page 100]

suppabuddhaṁ pabujjhanti ~ sadā gotamasāvakā
yesaṁ divā ca ratto ca ~ bhāvanāya rato mano. [301]

duppabbajjaṁ durabhiramaṁ, ~ durāvāsā gharā dukhā,
dukkhosamānasaṁvāso, ~ dukkhānupatitaddhagū,
tasmā na caddhagū siyā ~ dukkhānupatito siyā. [302]

saddho sīlena sampanno ~ yasobhogasamappito,
yaṁ yaṁ padesaṁ bhajati ~ tattha tattheva pūjito. [303]

dūre santo pakāsanti ~ himavanto va pabbato,
asantettha na dissanti ~ rattiṁ khittā yathā sarā. [304]

ekāsanaṁ ekaseyyaṁ ~ eko caram-atandito
eko damayam-attānaṁ ~ vanante ramito siyā. [305]

Pakiṇṇakavaggo Ekavīsatimo. Editor's note: BJT, ekavīsatimo Pakiṇṇakavaggo, against its normal practice of putting the name first.01

 

 

last updated: August 2010