Dhammapadapāḷi

22. Nirayavaggo

 

abhūtavādī nirayaṁ upeti,
yo cāpi katvā na karomī ti cāha,
ubho pi te pecca samā bhavanti,
nihīnakammā manujā parattha. [306]

[BJT page 102]

kāsāvakaṇṭhā bahavo ~ pāpadhammā asaññatā,
pāpā pāpehi kammehi ~ nirayaṁ te upapajjare. [307]

seyyo ayoguḷo bhutto ~ tatto aggisikhūpamo,
yañ-ce bhuñjeyya Editor's note: BJT, bhūñjeyya, printer's error.01 dussīlo ~ raṭṭhapiṇḍaṁ asaññato. [308]

cattāri ṭhānāni naro pamatto
āpajjati paradārūpasevī,
apuññalābhaṁ na nikāmaseyyaṁ,
nindaṁ tatiyaṁ nirayaṁ catutthaṁ. [309]

apuññalābho ca gatī ca pāpikā,
bhītassa bhītāya ratī ca thokikā,
rājā ca daṇḍaṁ garukaṁ paṇeti -
tasmā naro paradāraṁ na seve. [310]

kuso yathā duggahito ~ hattham-evānukantati,
sāmaññaṁ dupparāmaṭṭhaṁ ~ nirayāyupakaḍḍhati. [311]

yaṁ kiñci sithilaṁ kammaṁ, ~ saṅkiliṭṭhañ-ca yaṁ vataṁ,
saṅkassaraṁ brahmacariyaṁ, ~ na taṁ hoti mahapphalaṁ. [312]

kayirā ce kayirāthenaṁ ~ daḷham-enaṁ parakkame,
saṭhilo hi paribbājo ~ bhiyyo ākirate rajaṁ. [313]

akataṁ dukkataṁ seyyo, ~ pacchā tapati dukkataṁ,
katañ-ca sukataṁ seyyo, ~ yaṁ katvā nānutappati. [314]

[BJT page104]

nagaraṁ yathā paccantaṁ ~ guttaṁ santarabāhiraṁ,
evaṁ gopetha attānaṁ, ~ khaṇo vo mā upaccagā,
khaṇātītā hi socanti ~ nirayamhi samappitā. [315]

alajjitāye lajjanti, ~ lajjitāye na lajjare,
micchādiṭṭhisamādānā, ~ sattā gacchanti duggatiṁ. [316]

abhaye bhayadassino, ~ bhaye cābhayadassino,
micchādiṭṭhisamādānā, ~ sattā gacchanti duggatiṁ. [317]

avajje vajjamatino, ~ vajje cāvajjadassino,
micchādiṭṭhisamādānā, ~ sattā gacchanti duggatiṁ. [318]

vajjañ-ca vajjato ñatvā, ~ avajjañ-ca avajjato,
sammādiṭṭhisamādānā, ~ sattā gacchanti suggatiṁ. [319]

Nirayavaggo dvāvīsatimo.

 

 

last updated: March 2006