Dhammapadapāḷi

25. Bhikkhuvaggo

 

cakkhunā saṁvaro sādhu, ~ sādhu sotena saṁvaro,
ghāṇena saṁvaro sādhu, ~ sādhu jivhāya saṁvaro. [360]

kāyena saṁvaro sādhu, ~ sādhu vācāya saṁvaro,
manasā saṁvaro sādhu, ~ sādhu sabbattha saṁvaro,
sabbattha saṁvuto bhikkhu ~ sabbadukkhā pamuccati. [361]

hatthasaṁyato pādasaṁyato,
vācāya saṁyato saṁyatuttamo,
ajjhattarato samāhito,
eko santusito tam-āhu bhikkhuṁ. [362]

yo mukhasaṁyato bhikkhu, ~ mantabhāṇī anuddhato,
atthaṁ dhammañ-ca dīpeti ~ madhuraṁ tassa bhāsitaṁ. [363]

dhammārāmo dhammarato, ~ dhammaṁ anuvicintayaṁ,
dhammaṁ anussaraṁ bhikkhu, ~ saddhammā na parihāyati. [364]

salābhaṁ nātimaññeyya, ~ nāññesaṁ pihayaṁ care,
aññesaṁ pihayaṁ bhikkhu ~ samādhiṁ nādhigacchati. [365]

appalābho pi ce bhikkhu ~ salābhaṁ nātimaññati,
taṁ ve devā pasaṁsanti ~ suddhājīviṁ atanditaṁ. [366]

[BJT page 116]

sabbaso nāmarūpasmiṁ ~ yassa natthi mamāyitaṁ,
asatā ca na socati, ~ sa ve ‘bhikkhū’ ti vuccati. [367]

mettāvihārī yo bhikkhu, Editor's note: BJT, bhikkhū, printer's error.01 ~ pasanno buddhasāsane,
adhigacche padaṁ santaṁ, ~ saṅkhārūpasamaṁ sukhaṁ. [368]

siñca bhikkhu imaṁ nāvaṁ, ~ sittā te lahum-essati,
chetvā rāgaṁ dosañ-ca, ~ tato nibbāṇam-ehisi. [369]

pañca chinde pañca jahe, ~ pañca cuttari bhāvaye,
pañca saṅgātigo bhikkhu ~ ‘oghatiṇṇo’ ti vuccati. [370]

jhāya bhikkhu mā ca pāmado,
mā te kāmaguṇe bhamassu cittaṁ,
mā lohaguḷaṁ gilī pamatto,
mā kandi ‘dukkham-idan’-ti ḍayhamāno. [371]

natthi jhānaṁ apaññassa, ~ paññā natthi ajhāyato,
yamhi jhānañ-ca paññā ca ~ sa ve nibbāṇasantike. [372]

suññāgāraṁ paviṭṭhassa, ~ santacittassa bhikkhuno,
amānusī rati hoti ~ sammā dhammaṁ vipassato. [373]

yato yato sammasati ~ khandhānaṁ udayabbayaṁ
labhati pītipāmojjaṁ, ~ amataṁ taṁ vijānataṁ. [374]

tatrāyam-ādi bhavati ~ idha paññassa bhikkhuno:
indriyagutti santuṭṭhī ~ pātimokkhe ca saṁvaro. [375]

[BJT page 118]

mitte bhajassu kalyāṇe ~ suddhājīve atandite,
paṭisanthāravuttyassa, ~ ācārakusalo siyā,
tato pāmojjabahulo ~ dukkhassantaṁ karissasi. [376]

vassikā viya pupphāni ~ maddavāni pamuñcati,
evaṁ rāgañ-ca dosañ-ca ~ vippamuñcetha bhikkhavo. [377]

santakāyo santavāco ~ santavā susamāhito
vantalokāmiso bhikkhu ~ ‘upasanto’ ti vuccati. [378]

attanā codayattānaṁ, ~ paṭimāsettam-attanā,
so attagutto satimā ~ sukhaṁ bhikkhu vihāhisi. [379]

attā hi attano nātho, ~ attā hi attano gati,
tasmā saññamayattānaṁ ~ assaṁ bhadraṁ va vāṇijo. [380]

pāmojjabahulo bhikkhu, ~ pasanno buddhasāsane,
adhigacche padaṁ santaṁ, ~ saṅkhārūpasamaṁ sukhaṁ. [381]

yo have daharo bhikkhu ~ yuñjati buddhasāsane,
so imaṁ lokaṁ pabhāseti ~ abbhā mutto va candimā. [382]

Bhikkhuvaggo pañcavīsatimo.

 

 

last updated: March 2006