Dhammapadapāḷi

26. Brāhmaṇavaggo

 

chinda sotaṁ parakkamma, ~ kāme panuda brāhmaṇa,
saṅkhārānaṁ khayaṁ ñatvā, ~ akataññūsi brāhmaṇa. [383]

yadā dvayesu dhammesu ~ pāragū hoti brāhmaṇo,
athassa sabbe saṁyogā ~ atthaṁ gacchanti jānato. [384]

[BJT page 120]

yassa pāraṁ apāraṁ vā ~ pārāpāraṁ na vijjati,
vītaddaraṁ visaṁyuttaṁ, ~ tam-ahaṁ brūmi brāhmaṇaṁ. [385]

jhāyiṁ virajam-āsīnaṁ ~ katakiccaṁ anāsavaṁ
uttamatthaṁ anuppattaṁ, ~ tam-ahaṁ brūmi brāhmaṇaṁ. [386]

divā tapati ādicco, ~ rattiṁ ābhāti candimā,
sannaddho khattiyo tapati, ~ jhāyī tapati brāhmaṇo,
atha sabbam-ahorattiṁ ~ buddho tapati tejasā. [387]

bāhitapāpo ti brāhmaṇo,
samacariyā samaṇo ti vuccati,
pabbājayattano malaṁ,
tasmā pabbajito ti vuccati. [388]

na brāhmaṇassa pahareyya, ~ nāssa muñcetha brāhmaṇo,
dhī brāhmaṇassa hantāraṁ, ~ tato dhī yassa muñcati. [389]

na brāhmaṇassetad-akiñci seyyo,
yadā nisedho manaso piyehi,
yato yato hiṁsamano nivattati,
tato tato sammati-m-eva dukkhaṁ. [390]

yassa kāyena vācāya, ~ manasā natthi dukkataṁ,
saṁvutaṁ tīhi ṭhānehi, ~ tam-ahaṁ brūmi brāhmaṇaṁ. [391]

yamhā dhammaṁ vijāneyya ~ sammāsambuddhadesitaṁ,
sakkaccaṁ taṁ namasseyya ~ aggihuttaṁ va brāhmaṇo. [392]

[BJT page 122]

na jaṭāhi na gottena, ~ na jaccā hoti brāhmaṇo,
yamhi saccañ-ca dhammo ca ~ so sucī so va brāhmaṇo. [393]

kiṁ te jaṭāhi dummedha ~ kiṁ te ajinasāṭiyā,
abbhantaraṁ te gahaṇaṁ ~ bāhiraṁ parimajjasi. [394]

paṁsukūladharaṁ jantuṁ, Editor's note: BJT, jantūṁ, printer's error.01 ~ kisaṁ dhamanisanthataṁ,
ekaṁ vanasmiṁ jhāyantaṁ, ~ tam-ahaṁ brūmi brāhmaṇaṁ. [395]

na cāhaṁ brāhmaṇaṁ brūmi ~ yonijaṁ mattisambhavaṁ,
bhovādī nāma so hoti ~ sa ce hoti sakiñcano,
akiñcanaṁ anādānaṁ, ~ tam-ahaṁ brūmi brāhmaṇaṁ. [396]

sabbasaṁyojanaṁ chetvā ~ yo ve na paritassati,
saṅgātigaṁ visaṁyuttaṁ Editor's note: BJT spells the word visaññuttaṁ here, but visaṁyuttaṁ elsewhere; cf. 385, 402, 410, 417.21, ~ tam-ahaṁ brūmi brāhmaṇaṁ. [397]

chetvā naddhiṁ varattañ-ca, ~ sandāmaṁ sahanukkamaṁ,
ukkhittapalighaṁ buddhaṁ, ~ tam-ahaṁ brūmi brāhmaṇaṁ. [398]

akkosaṁ vadhabandhañ-ca, ~ aduṭṭho yo titikkhati,
khantibalaṁ balānīkaṁ, ~ tam-ahaṁ brūmi brāhmaṇaṁ. [399]

akkodhanaṁ vatavantaṁ, ~ sīlavantaṁ anussutaṁ,
dantaṁ antimasārīraṁ, ~ tam-ahaṁ brūmi brāhmaṇaṁ. [400]

vāri pokkharapatte va, ~ āragge-r-iva sāsapo,
yo na lippati kāmesu, ~ tam-ahaṁ brūmi brāhmaṇaṁ. [401]

yo dukkhassa pajānāti ~ idheva khayam-attano,
pannabhāraṁ visaṁyuttaṁ, ~ tam-ahaṁ brūmi brāhmaṇaṁ. [402]

[BJT page 124]

gambhīrapaññaṁ medhāviṁ, ~ maggāmaggassa kovidaṁ,
uttamatthaṁ anuppattaṁ, ~ tam-ahaṁ brūmi brāhmaṇaṁ. [403]

asaṁsaṭṭhaṁ gahaṭṭhehi, ~ anāgārehi cūbhayaṁ,
anokasāriṁ appicchaṁ, ~ tam-ahaṁ brūmi brāhmaṇaṁ. [404]

nidhāya daṇḍaṁ bhūtesu ~ tasesu thāvaresu ca,
yo na hanti na ghāteti, ~ tam-ahaṁ brūmi brāhmaṇaṁ. [405]

aviruddhaṁ viruddhesu, ~ attadaṇḍesu nibbutaṁ,
sādānesu anādānaṁ, ~ tam-ahaṁ brūmi brāhmaṇaṁ. [406]

yassa rāgo ca doso ca ~ māno makkho ca pātito,
sāsapo-r-iva āraggā, ~ tam-ahaṁ brūmi brāhmaṇaṁ. [407]

akakkasaṁ viññapaniṁ ~ giraṁ saccaṁ udīraye,
yāya nābhisaje kañci, ~ tam-ahaṁ brūmi brāhmaṇaṁ. [408]

yodha dīghaṁ va rassaṁ vā ~ aṇuṁ-thūlaṁ subhāsubhaṁ
loke adinnaṁ nādiyati, ~ tam-ahaṁ brūmi brāhmaṇaṁ. [409]

āsā yassa na vijjanti ~ asmiṁ loke paramhi ca,
nirāsayaṁ visaṁyuttaṁ, ~ tam-ahaṁ brūmi brāhmaṇaṁ. [410]

yassālayā na vijjanti, ~ aññāya akathaṅkathī,
amatogadhaṁ anuppattaṁ, ~ tam-ahaṁ brūmi brāhmaṇaṁ. [411]

yodha puññañ-ca pāpañ-ca ~ ubho saṅgaṁ upaccagā,
asokaṁ virajaṁ suddhaṁ, ~ tam-ahaṁ brūmi brāhmaṇaṁ. [412]

candaṁ va vimalaṁ suddhaṁ, ~ vippasannam-anāvilaṁ
nandībhavaparikkhīṇaṁ, ~ tam-ahaṁ brūmi brāhmaṇaṁ. [413]

[BJT page 126]

yo imaṁ paḷipathaṁ duggaṁ ~ saṁsāraṁ moham-accagā,
tiṇṇo pāragato jhāyī ~ anejo akathaṅkathī,
anupādāya nibbuto, ~ tam-ahaṁ brūmi brāhmaṇaṁ. [414]

yodha kāme pahātvāna ~ anāgāro paribbaje
kāmabhavaparikkhīṇaṁ, ~ tam-ahaṁ brūmi brāhmaṇaṁ. [415]

yodha taṇhaṁ pahatvāna, ~ anāgāro paribbaje,
taṇhābhavaparikkhīṇaṁ, ~ tam-ahaṁ brūmi brāhmaṇaṁ. [416]

hitvā mānusakaṁ yogaṁ, ~ dibbaṁ yogaṁ upaccagā,
sabbayogavisaṁyuttaṁ, ~ tam-ahaṁ brūmi brāhmaṇaṁ. [417]

hitvā ratiñ-ca aratiñ-ca, ~ sītibhūtaṁ nirūpadhiṁ,
sabbalokābhibhuṁ vīraṁ, ~ tam-ahaṁ brūmi brāhmaṇaṁ. [418]

cutiṁ yo vedi sattānaṁ ~ upapattiñ-ca sabbaso,
asattaṁ sugataṁ buddhaṁ, ~ tam-ahaṁ brūmi brāhmaṇaṁ. [419]

yassa gatiṁ na jānanti, ~ devā gandhabbamānusā,
khīṇāsavaṁ arahantaṁ, ~ tam-ahaṁ brūmi brāhmaṇaṁ. [420]

 

yassa pure ca pacchā ca ~ majjhe ca natthi kiñcanaṁ,
akiñcanaṁ anādānaṁ, ~ tam-ahaṁ brūmi brāhmaṇaṁ. [421]

usabhaṁ pavaraṁ vīraṁ, ~ mahesiṁ vijitāvinaṁ,
anejaṁ nhātakaṁ buddhaṁ, ~ tam-ahaṁ brūmi brāhmaṇaṁ. [422]

[BJT page 128]

pubbenivāsaṁ yo vedī, ~ saggāpāyañ-ca passati,
atho jātikkhayaṁ patto, ~ abhiññāvosito muni,
sabbavositavosānaṁ, ~ tam-ahaṁ brūmi brāhmaṇaṁ. [423]

Brāhmaṇavaggo chabbīsatimo.

Vagguddānaṁ:

Yamakappamādo cittaṁ, ~ pupphaṁ bālena paṇḍito,
Arahanto sahassena, ~ pāpadaṇḍena te dasa. [1]

Jarā attā ca loko ca, ~ Buddho sukhapiyena ca,
Kodho malañ-ca dhammaṭṭho, ~ maggavaggena vīsati. [2]

Pakiṇṇaṁ nirayo nāgo, ~ taṇhā bhikkhu ca brāhmaṇo,
Ete chabbīsati vaggā, ~ desitādiccabandhunā. [3]

Gāthuddānaṁ:

Yamake vīsati gāthā, ~ appamādamhi dvādasa,
Ekādasa cittavagge, ~ pupphavaggamhi soḷasa. [1]

Bāle ca soḷasa gāthā, ~ paṇḍitamhi catuddasa,
Arahante dasa gāthā, ~ sahasse honti soḷasa. [2]

Terasa pāpavaggamhi, ~ daṇḍamhi dasa satta ca,
Ekādasa jarāvagge, ~ attavagge bhave dasa. [3]

Dvādasa lokavaggamhi, ~ Buddhe caṭṭhārasā Editor's note: BJT, caṭṭhārasa, printer's error.03 bhave,
Sukhe ca piyavagge ca, ~ gāthāyo honti dvādasa. [4]

Cuddasa kodhavaggamhi, ~ malavaggekavīsati,
Sattarasa ca dhammaṭṭhe, ~ maggavagge tatheva ca. [5]

Pakiṇṇe soḷasa gāthā, ~ niraye nāge catuddasa,
Chabbīsati taṇhāvaggamhi, ~ tevīsa bhikkhuvaggikā. [6]

Cattāḷīsekagāthāyo, ~ brāhmaṇe vaggam-uttame,
Gāthā satāni cattāri, ~ tevīsa ca punāpare,
Dhammapade nipātamhi ~ desitādiccabandhunā ti. [7]

Dhammapadapāḷi niṭṭhitā.

 

 

last updated: March 2006