Mucalindavaggo dutiyo

2-10: Bhaddiyasuttaṁ (20)

1. evaṁ me sutaṁ:
ekaṁ samayaṁ bhagavā anupiyāyaṁ viharati ambavane. tena kho pana samayena āyasmā bhaddiyo kāḷigodhāya putto, araññagato pi rukkhamūlagato pi suññāgāragato pi, abhikkhaṇaṁ udānaṁ udāneti: “aho sukhaṁ! aho sukhan!” ti assosuṁ kho sambahulā bhikkhu āyasmato bhaddiyassa kāḷigodhāya puttassa, araññagatassa pi rukkhamūlagatassa pi suññāgāragatassa pi, abhikkhaṇaṁ udānaṁ udānentassa: “aho sukhaṁ! aho sukhan!”-ti sutvāna nesaṁ etad-ahosi: “nissaṁsayaṁ kho āvuso āyasmā bhaddiyo kāḷigodhāya putto, anabhirato brahmacariyaṁ carati, yaṁsa pubbe agāriyabhūtassa rajjasukhaṁ so tam-anussaramāno,araññagato pi rukkhamūlagato pi suññāgāragato pi, abhikkhaṇaṁ udānaṁ udāneti: “aho sukhaṁ! aho sukhan!”-ti

2. atha kho sambahulā bhikkhū yena bhagavā tenupasaṅkamiṁsu, upasaṅkamitvā bhagavantaṁ abhivādetvā, ekamantaṁ nisīdiṁsu. ekamantaṁ nisinnā kho te bhikkhū bhagavantaṁ etad-avocuṁ: “āyasmā bhante bhaddiyo kāḷigodhāya putto, araññagato pi rukkhamūlagato pi suññāgāragato pi, abhikkhaṇaṁ udānaṁ udāneti: “aho sukhaṁ! aho sukhan!”-ti nissaṁsayaṁ kho bhante āyasmā bhaddiyo kāḷigodhāya putto, anabhirato brahmacariyaṁ carati, yaṁsa pubbe agāriyabhūtassa rajjasukhaṁ, so tam-anussaramāno, araññagato pi rukkhamūlagato pi suññāgāragato pi, abhikkhaṇaṁ udānaṁ udāneti: “aho sukhaṁ! aho sukhan!”-ti

3. atha kho bhagavā aññataraṁ bhikkhuṁ āmantesi: “ehi tvaṁ bhikkhu mama vacanena bhaddiyaṁ bhikkhuṁ āmantehi: ‘satthā taṁ āvuso bhaddiya āmantetī’ ” ti.

[BJT Page 168]

“evaṁ bhante,” ti kho so bhikkhu bhagavato paṭissutvā, yenāyasmā bhaddiyo kāḷigodhāya putto tenupasaṅkami, upasaṅkamitvā, āyasmantaṁ bhaddiyaṁ kāḷigodhāya puttaṁ etad-avoca: “satthā taṁ āvuso bhaddiya āmantetī” ti. “evam-āvuso” ti kho āyasmā bhaddiyo kāḷigodhāya putto, tassa bhikkhuno paṭissutvā, yena bhagavā tenupasaṅkami, upasaṅkamitvā bhagavantaṁ abhivādetvā, ekamantaṁ nisīdi. ekamantaṁ nisinnaṁ kho āyasmantaṁ bhaddiyaṁ kāḷigodhāya puttaṁ bhagavā etad-avoca: “saccaṁ kira tvaṁ bhaddiya, araññagato pi rukkhamūlagato pi suññāgāragato pi, abhikkhaṇaṁ udānaṁ udānesi: ‘aho sukhaṁ! aho sukhan!’-ti?” “evaṁ bhante,” ti. “kiṁ pana tvaṁ bhaddiya atthavasaṁ sampassamāno araññagato pi rukkhamūlagato pi suññāgāragato pi, abhikkhaṇaṁ udānaṁ udānesi: ‘aho sukhaṁ! aho sukhan!’-ti?”

“pubbe me bhante agāriyabhūtassa rajjaṁ kārentassa, anto pi antepure rakkhā susaṁvihitā ahosi, bahi pi antepure rakkhā susaṁvihitā ahosi, anto pi nagare rakkhā susaṁvihitā ahosi, bahi pi nagare rakkhā susaṁvihitā ahosi, anto pi janapade rakkhā susaṁvihitā ahosi, bahi pi janapade rakkhā susaṁvihitā ahosi, so kho ahaṁ bhante evaṁ rakkhitagopito santo, bhīto ubbiggo ussaṅkī utrāsī BJT note: utrāso - ChS.01 vihāsiṁ. etarahi kho panāhaṁ bhante araññagato pi rukkhamūlagato pi suññāgāragato pi, eko abhīto anubbiggo anussaṅkī anutrāsī, BJT note: anutrāso - ChS.02 appossukko pannalomo paradavutto BJT note: paravutto - palm leaf book; printed book.03 migabhūtena cetasā viharāmi. idaṁ kho ahaṁ bhante atthavasaṁ sampassamāno, araññagato pi rukkhamūlagato pi suññāgāragato pi, abhikkhaṇaṁ udānaṁ udānemi: BJT note: udānesi - palm leaf book; printed book.04 ‘aho sukhaṁ! aho sukhan!’ ”-ti.

4. atha kho bhagavā etam-atthaṁ viditvā, tāyaṁ velāyaṁ imaṁ udānaṁ udānesi:

−−⏑⏑¦−⏑−⏑−−   Opacchandasaka x 4
“yassantarato na santi kopā,

⏑⏑⏑−⏑⏑¦−⏑−⏑−− 
iti bhavābhavatañ-ca vītivatto,Metre: The 1st syllable of this line is pādādigaru (i. e. has to be counted as long to correct the metre, this occassionally occurs with the 1st syllables in Mattāchandas lines).05

−⏑⏑⏑⏑¦−⏑−⏑−−
taṁ vigatabhayaṁ sukhiṁ asokaṁ,

−−−⏑⏑¦−⏑−⏑−−
devā nānubhavanti dassanāyā” ti.

Mucalindavaggo dutiyo

tassuddānaṁ:

Mucalindo Rājā Daṇḍena, ~ Sakkāro Upāsakena ca,
Gabbhinī Ekaputto ca,
Suppavāsā Visākhā ca, ~ Kāḷīgodhāya Bhaddiyo ti.