Meghiyavaggo catuttho

4-3: Gopālasuttaṁ (33)

1. evaṁ me sutaṁ:
ekaṁ samayaṁ bhagavā kosalesu BJT note: janapadesu - seen somewhere.01 cārikaṁ carati, mahatā bhikkhusaṅghena saddhiṁ. atha kho bhagavā maggā okkamma, yena aññataraṁ rukkhamūlaṁ tenupasaṅkami, upasaṅkamitvā paññatte āsane nisīdi. atha kho aññataro gopālako yena bhagavā tenupasaṅkami, upasaṅkamitvā bhagavantaṁ abhivādetvā, ekamantaṁ nisīdi. ekamantaṁ nisinnaṁ kho taṁ gopālakaṁ bhagavā dhammiyā kathāya sandassesi samādapesi samuttejesi sampahaṁsesi.

2. atha kho so gopālako bhagavatā dhammiyā kathāya sandassito samādapito samuttejito sampahaṁsito, bhagavantaṁ etad-avoca: “adhivāsetu me bhante bhagavā svātanāya bhattaṁ saddhiṁ bhikkhusaṅghenā” ti. adhivāsesi bhagavā tuṇhībhāvena. atha kho so gopālako bhagavato adhivāsanaṁ viditvā, uṭṭhāyāsanā bhagavantaṁ abhivādetvā padakkhiṇaṁ katvā pakkāmi. atha kho so gopālako tassā rattiyā accayena, sake nivesane, pahūtaṁ appodakapāyāsaṁ paṭiyādāpetvā navañ-ca sappiṁ, bhagavato kālaṁ ārocesi: “kālo bhante niṭṭhitaṁ bhattan”-ti.

[BJT Page 204]

3. atha kho bhagavā pubbanhasamayaṁ nivāsetvā, pattacīvaram-ādāya, saddhiṁ bhikkhusaṅghena yena tassa gopālakassa nivesanaṁ tenupasaṅkami, upasaṅkamitvā paññatte āsane nisīdi. atha kho so gopālako buddhapamukhaṁ bhikkhusaṅghaṁ appodakapāyāsena navena ca sappinā sahatthā santappesi sampavāresi. atha kho so gopālako, bhagavantaṁ bhuttāviṁ onītapattapāṇiṁ, aññataraṁ nīcaṁ āsanaṁ gahetvā ekamantaṁ nisīdi. ekamantaṁ nisinnaṁ kho taṁ gopālakaṁ bhagavā dhammiyā kathāya sandassetvā samādapetvā samuttejetvā sampahaṁsetvā, uṭṭhāyāsanā pakkāmi. atha kho acirapakkantassa bhagavato taṁ gopālakaṁ aññataro puriso sīmantarikāya jīvitā voropesi.

4. atha kho sambahulā bhikkhū yena bhagavā tenupasaṅkamiṁsu, upasaṅkamitvā bhagavantaṁ abhivādetvā, ekamantaṁ nisīdiṁsu. ekamantaṁ nisinnā kho te bhikkhū bhagavantaṁ etad-avocuṁ: “yena bhante gopālakena ajja buddhapamukho bhikkhusaṅgho appodakapāyāsena navena ca sappinā sahatthā santappito sampavārito, so kira bhante gopālako, aññatarena purisena sīmantarikāya jīvitā voropito” ti.

5. atha kho bhagavā etam-atthaṁ viditvā, tāyaṁ velāyaṁ imaṁ udānaṁ udānesi:

⏑−⏑−−¦−−−¦¦−−−⏑¦⏑−⏑−   mavipula
“diso disaṁ yan-taṁ kayirā, ~ verī vā pana verinaṁ,

−−⏑⏑¦⏑−−−¦¦−⏑−−¦⏑−⏑−
micchāpaṇihitaṁ cittaṁ ~ pāpiyo naṁ tato kare” ti.