Soṇavaggo pañcamo BJT note: Soṇattherassa - palm leaf book.01

5-1: Rājasuttaṁ (41)

1. evaṁ me sutaṁ:
ekaṁ samayaṁ bhagavā sāvatthiyaṁ viharati, jetavane anāthapiṇḍikassa ārāme. tena kho pana samayena rājā pasenadi kosalo mallikāya deviyā saddhiṁ uparipāsādavaragato hoti. atha kho rājā pasenadi kosalo mallikaṁ deviṁ etad-avoca: “atthi nu kho te mallike kocañño attanā piyataro?” ti. “natthi kho me mahārāja kocañño attanā piyataro ti. tuyhaṁ pana mahārāja atthañño koci attanā piyataro?” ti. “mayham-pi kho mallike natthañño koci attanā piyataro” ti.

2. atha kho rājā pasenadi kosalo pāsādā orohitvā, yena bhagavā tenupasaṅkami, upasaṅkamitvā bhagavantaṁ abhivādetvā, ekamantaṁ nisīdi. ekamantaṁ nisinno kho rājā pasenadi kosalo bhagavantaṁ etad-avoca: “idhāhaṁ bhante mallikāya deviyā saddhiṁ uparipāsādavaragato mallikādeviṁ etad-avocaṁ: ‘atthi nu kho te mallike kocañño attanā piyataro?’ ti. evaṁ vutte, mallikādevī maṁ etad-avoca: ‘natthi kho me mahārāja kocañño attanā piyataro ti. tuyhaṁ pana mahārāja atthañño koci Editor's note: BJT, kocañño, printer's error, correct elsewhere.02 attanā piyataro?’ ti. evaṁ vutte, ahaṁ bhante mallikaṁ deviṁ etad-avocaṁ: ‘mayham-pi kho mallike natthañño koci attanā piyataro’ ” ti.

3. atha kho bhagavā etam-atthaṁ viditvā, tāyaṁ velāyaṁ imaṁ udānaṁ udānesi:

−−⏑−,¦⏑⏑⏑⏑¦−⏑−⏑−   Rucirā x2
“sabbā disā anuparigamma cetasā,

−−⏑−,¦⏑⏑⏑⏑¦−⏑−⏑−
nevajjhagā piyataramattanā kvaci.

−−⏑−,¦⏑⏑−¦−⏑−−   Tuṭṭḥubha x2
evaṁ piyo puthu attā paresaṁ,

−−⏑−¦−,⏑⏑¦−⏑−−
tasmā na hiṁse paramattakāmo” ti.