Pāṭaligāmiyavaggo aṭṭhamo.

8-4: Catutthanibbānasuttaṁ (74)

1. evaṁ me sutaṁ:
ekaṁ samayaṁ bhagavā sāvatthiyaṁ viharati, jetavane anāthapiṇḍikassa ārāme. tena kho pana samayena bhagavā bhikkhū nibbānapaṭisaṁyuttāya dhammiyā kathāya sandasseti samādapeti samuttejeti sampahaṁseti. te ca bhikkhū aṭṭhī katvā manasikatvā, sabbaṁ cetaso samannāharitvā, ohitasotā dhammaṁ suṇanti.

2. atha kho bhagavā etam-atthaṁ viditvā, tāyaṁ velāyaṁ imaṁ udānaṁ udānesi:

[BJT Page 294]

“nissitassa calitaṁ, anissitassa calitaṁ natthi. calite asati passaddhi, passaddhiyā sati nati na hoti. natiyā asati, āgati gati na hoti. āgati gatiyā asati, cutupapāto na hoti. cutupapāte asati nevidha na huraṁ na ubhayam-antare - esevanto dukkhassā” ti.