Pāṭaligāmiyavaggo aṭṭhamo.

8-7: Dvidhāpathasuttaṁ (77)

1. evaṁ me sutaṁ:
ekaṁ samāyaṁ bhagavā kosalesu addhānamaggapaṭipanno hoti āyasmatā nāgasamālena pacchāsamaṇena. addasā kho āyasmā nāgasamālo antarāmagge dvedhāpathaṁ, disvāna, bhagavantaṁ etad-avoca: “ayaṁ bhante bhagavā pantho iminā gacchāmā” ti. evaṁ vutte, bhagavā āyasmantaṁ nāgasamālaṁ etad-avoca: “ayaṁ nāgasamāla pantho iminā gacchāmā” ti. dutiyam-pi kho āyasmā nāgasamālo bhagavantaṁ etad-avoca: “ayaṁ bhante bhagavā pantho iminā gacchāmā” ti. evaṁ vutte, bhagavā āyasmantaṁ nāgasamālaṁ etad-avoca: “ayaṁ nāgasamāla pantho iminā gacchāmā” ti. tatiyam-pi kho āyasmā nāgasamālo bhagavantaṁ etad-avoca: “ayaṁ bhante bhagavā pantho iminā gacchāmā” ti. evaṁ vutte, bhagavā āyasmantaṁ nāgasamālaṁ etad-avoca: “ayaṁ nāgasamāla pantho iminā gacchāmā” ti. atha kho āyasmā nāgasamālo bhagavato pattacīvaraṁ tattheva chamāyaṁ nikkhipitvā pakkāmi: “idaṁ bhante bhagavato pattacīvaran”-ti.

2. atha kho āyasmato nāgasamālassa tena panthena gacchantassa, antarāmagge corā nikkhamitvā, hatthehi ca pādehi ca viheṭhesuṁ, pattañ-ca bhindiṁsu, saṅghāṭiñ-ca vipphālesuṁ. atha kho āyasmā nāgasamālo bhinnena pattena vipphālitāya saṅghāṭiyā, yena bhagavā tenupasaṅkami, upasaṅkamitvā bhagavantaṁ abhivādetvā, ekamantaṁ nisīdi. ekamantaṁ nisinno kho āyasmā nāgasamālo bhagavantaṁ etad-avoca: “idha mayhaṁ bhante tena panthena gacchantassa, antarāmagge corā nikkhamitvā hatthehi ca pādehi ca viheṭhesuṁ, pattañ-ca bhindiṁsu, saṅghāṭiñ-ca vipphālesun”-ti.

3. atha kho bhagavā etam-atthaṁ viditvā, tāyaṁ velāyaṁ imaṁ udānaṁ udānesi:

−−⏑⏑¦−⏑−⏑−   Vetālīya x4
“saddhiṁ caram-ekato vasaṁ,

−−−⏑⏑¦−⏑−⏑−
misso aññajanena vedagū,

−−⏑⏑¦−⏑−⏑−
vidvā pajahāti pāpakaṁ,

−−−⏑⏑¦−⏑−⏑−
koñco khīrapako va ninnagan”-ti.

[BJT Page 312]