Itivuttakapāḷi

1. 1. 7. Sabbapariññāsuttaṁ (7)

vuttaṁ hetaṁ bhagavatā, vuttam-arahatā ti me sutaṁ:

“sabbaṁ bhikkhave anabhijānaṁ aparijānaṁ tattha cittaṁ avirājayaṁ appajahaṁ abhabbo dukkhakkhayāya. sabbañ-ca kho bhikkhave abhijānaṁ parijānaṁ tattha cittaṁ virājayaṁ pajahaṁ bhabbo dukkhakkhayāyā” ti.

etam-atthaṁ bhagavā avoca, tatthetaṁ iti vuccati:

[BJT Page 324]

−−−−¦⏑−−−¦¦−−−⏑¦⏑−⏑⏑
“yo sabbaṁ sabbato ñatvā   sabbatthesu na rajjati,

⏑−−−¦⏑−−−¦¦−−⏑−⏑¦⏑−⏑−
sa ve sabbaṁ pariññāya   so sabbadukkham-upaccagā” ti. [1]

ayam-pi attho vutto bhagavatā, iti me sutan-ti.