Itivuttakapāḷi
1. 1. 9. Lobhapariññāsuttaṁ (9)
vuttaṁ hetaṁ bhagavatā, vuttam-arahatā ti me sutaṁ:
“lobhaṁ bhikkhave anabhijānaṁ aparijānaṁ tattha cittaṁ avirājayaṁ appajahaṁ abhabbo dukkhakkhayāya. lobhaṁ ca kho bhikkhave abhijānaṁ parijānaṁ tattha cittaṁ virājayaṁ pajahaṁ bhabbo dukkhakkhayāyā” ti.
etam-atthaṁ bhagavā avoca, tatthetaṁ iti vuccati:
[BJT Page 326]
“yena lobhena luddhāse sattā gacchanti duggatiṁ,
taṁ lobhaṁ sammad-aññāya pajahanti vipassino,
pahāya na punāyanti imaṁ lokaṁ kudācanan”-ti. [1]
ayam-pi attho vutto bhagavatā, iti me sutan-ti.