Itivuttakapāḷi

Dutiyo vaggo Editor's note: BJT prints Dutiyavaggo here and in what follows, but everywhere else it prints Paṭhamo vaggo, Tatiyo vaggo, Catuttho vaggo etc. Changed for consistency.01

[BJT Page 328]

1. 2. 1. Mohapariññāsuttaṁ (11)

vuttaṁ hetaṁ bhagavatā, vuttam-arahatā ti me sutaṁ:

“mohaṁ bhikkhave anabhijānaṁ aparijānaṁ tattha cittaṁ avirājayaṁ appajahaṁ abhabbo dukkhakkhayāya. mohañ-ca kho bhikkhave abhijānaṁ parijānaṁ tattha cittaṁ virājayaṁ pajahaṁ bhabbo dukkhakkhayāyā” ti.

etam-atthaṁ bhagavā avoca, tatthetaṁ iti vuccati:

−⏑−−¦⏑−−−¦¦−−−−¦⏑−⏑−
“yena mohena mūḷhāse   sattā gacchanti duggatiṁ,

−−−−¦⏑−−−¦¦⏑⏑−⏑¦⏑−⏑−
taṁ mohaṁ sammad-aññāya   pajahanti vipassino,

⏑−⏑⏑¦⏑−−−¦¦⏑−−−¦⏑−⏑−
pahāya na punāyanti   imaṁ lokaṁ kudācanan”-ti. [1]

ayam-pi attho vutto bhagavatā, iti me sutan-ti.