Itivuttakapāḷi

1. 2. 7. Dutiyasekhasuttaṁ (17)

[BJT Page 334]

vuttaṁ hetaṁ bhagavatā, vuttam-arahatā ti me sutaṁ:

“sekhassa bhikkhave bhikkhuno appattamānassa Editor's note: BJT again prints appattamānasassa here.01 anuttaraṁ yogakkhemaṁ patthayamānassa viharato bāhiraṁ aṅgan-ti karitvā na aññaṁ ekaṅgam-pi samanupassāmi evaṁ bahupakāraṁ yatha-y-idaṁ bhikkhave kalyāṇamittatā. kalyāṇamitto bhikkhave bhikkhu akusalaṁ pajahati kusalaṁ bhāvetī” ti.

etam-atthaṁ bhagavā avoca, tatthetaṁ iti vuccati:

−−⏑−¦−−−−¦¦−⏑−−¦⏑−⏑−   mavipulā
“kalyāṇamitto yo bhikkhu   sappatisso sagāravo,

⏑−−−¦−⏑⏑−¦¦−⏑−−¦⏑−⏑−   bhavipulā
karaṁ mittānaṁ vacanaṁ   sampajāno patissato,

−⏑−⏑¦⏑−−−¦¦−⏑−−¦⏑−⏑−
pāpuṇe anupubbena   sabbasaññojanakkhayan”-ti. [1]

ayam-pi attho vutto bhagavatā, iti me sutan-ti.