Itivuttakapāḷi

1. 3. 2. Māpuññabhāyīsuttaṁ BJT Note: Mettasutta - ChS.01 (22)

[BJT Page 340]

vuttaṁ hetaṁ bhagavatā, vuttam-arahatā ti me sutaṁ:

“mā bhikkhave puññānaṁ bhāyittha, sukhassetaṁ bhikkhave adhivacanaṁ iṭṭhassa kantassa piyassa manāpassa yadidaṁ puññāni. abhijānāmi kho panāhaṁ bhikkhave dīgharattaṁ katānaṁ puññānaṁ iṭṭhaṁ kantaṁ piyaṁ manāpaṁ vipākaṁ paccanubhūtaṁ. satta vassāni mettacittaṁ bhāvetvā satta saṁvaṭṭavivaṭṭakappe na-y-imaṁ lokaṁ punar-āgamāsiṁ. saṁvaṭṭamāne sudaṁ bhikkhave kappe ābhassarūpago homi. vivaṭṭamāne kappe suññaṁ brahmavimānaṁ upapajjāmi. tatra sudaṁ bhikkhave brahmā homi mahābrahmā abhibhu anabhibhūto aññad-atthudaso vasavattī. chattiṁsakkhattuṁ kho panāhaṁ bhikkhave sakko ahosiṁ devānam-indo, anekasatakkhattuṁ rājā ahosiṁ cakkavattī dhammiko dhammarājā cāturanto vijitāvī janapadatthāvariyappatto sattaratanasampanno. ko pana vādo padesarajjassa? tassa mayhaṁ bhikkhave etad-ahosi: “kissa nu kho me idaṁ kammassa phalaṁ, kissa kammassa vipāko, yenāhaṁ etarahi evaṁ mahiddhiko evaṁ mahānubhāvo?” ti. tassa mayhaṁ bhikkhave etad-ahosi: “tiṇṇaṁ kho me idaṁ kammānaṁ phalaṁ, tiṇṇaṁ kammānaṁ vipāko, yenāhaṁ etarahi evaṁ mahiddhiko evaṁ mahānubhāvo” ti, seyyathīdaṁ: dānassa damassa saññamassā” ti.

etam-atthaṁ bhagavā avoca, tatthetaṁ iti vuccati:

−⏑−⏑¦⏑−−−¦¦−⏑−−¦⏑−⏑−
“puññam-eva sŏ sikkheyya   āyataggaṁ sukhundrayaṁ,

−−⏑⏑¦⏑−−−¦¦−⏑−−¦⏑−⏑−
dānañ-ca samacariyañ-ca   mettacittañ-ca bhāvaye, [1]

−−−−¦−⏑−−¦¦⏑−⏑⏑¦⏑−⏑−   ravipulā
ete dhamme bhāvayitvā   tayo sukhasamuddaye,

−−−−¦⏑−−−¦¦−⏑−⏑¦⏑−⏑−
abyāpajjhaṁ sukhaṁ lokaṁ   paṇḍito upapajjatī” ti. [2]

ayam-pi attho vutto bhagavatā, iti me sutan-ti.