Itivuttakapāḷi

1. 3. 4. Aṭṭhipuñjasuttaṁ (24)

vuttaṁ hetaṁ bhagavatā, vuttam-arahatā ti me sutaṁ:

“ekapuggalassa bhikkhave kappaṁ sandhāvato saṁsarato siyā evaṁ mahā aṭṭhikaṅkalo aṭṭhipuñjo aṭṭhirāsi yathāyaṁ vepullapabbato, sace saṁhārako assa sambhatañ-ca na vinasseyyā” ti.

etam-atthaṁ bhagavā avoca, tatthetaṁ iti vuccati:

−−−−¦⏑−−−¦¦−⏑−−¦⏑−⏑−
“ekassekena kappena   puggalassaṭṭhisañcayo,

⏑−−⏑⏑¦⏑−−−¦¦⏑⏑−−¦⏑−⏑−
siyā pabbatasamo rāsi   iti vuttaṁ mahesinā. [1]

−−⏑−¦−−−−¦¦−−−−¦⏑−⏑−   mavipulā
so kho panāyaṁ akkhāto   vepullo pabbato mahā,

−⏑−−¦⏑−−−¦¦⏑⏑−−¦⏑−⏑−
uttaro gijjhakūṭassa   magadhānaṁ giribbaje. [2]

⏑−⏑⏑¦⏑−−−¦¦−−−−¦⏑−⏑−
yato ariyasaccāni   sammappaññāya passati, Metre: Note that in this line ariya- must be scanned as 3 syllables (⏑⏑⏑), whereas in line e of the same verse we have to understand a sarabhatti vowel in the same word (scanning −⏑) - a good example of how flexible these matters are in the canonical period.01
−−−⏑¦⏑−−−¦¦−−⏑⏑¦⏑−⏑−
dukkhaṁ dukkhasamuppādaṁ   dukkhassa ca atikkamaṁ,

⏑⏑−−−¦⏑−−−¦¦−−⏑⏑¦⏑−⏑−
ariyañ-caṭṭhaṅgikaṁ maggaṁ   dukkhūpasamagāminaṁ. [3]

−−−−¦⏑⏑−−¦¦−−−−¦⏑−⏑−    savipulā
sattakkhattuṁ paramañ-ca   sandhāvitvāna puggalo,

−−−⏑¦⏑−−−¦¦−⏑−−¦⏑−⏑−
dukkhassantakaro hoti   sabbasaṁyojanakkhayā” ti. [4]

ayam-pi attho vutto bhagavatā, iti me sutan-ti.