Itivuttakapāḷi

1. 3. 6. Dānasaṁvibhāgasuttaṁ (26)

vuttaṁ hetaṁ bhagavatā, vuttam-arahatā ti me sutaṁ:

“evañ-ce bhikkhave sattā jāneyyuṁ dānasaṁvibhāgassa vipākaṁ yathāhaṁ jānāmi, na adatvā bhuñjeyyuṁ, na ca nesaṁ maccheramalaṁ cittaṁ pariyādāya tiṭṭheyya. yo pi nesaṁ assa carimo ālopo carimaṁ kabaḷaṁ, tato pi na asaṁvibhajitvā bhuñjeyyuṁ sace nesaṁ paṭiggāhakā assu. yasmā ca kho bhikkhave sattā na evaṁ jānanti dānasaṁvibhāgassa vipākaṁ yathāhaṁ jānāmi, tasmā adatvā bhuñjanti maccheramalañ-ca nesaṁ cittaṁ pariyādāya tiṭṭhatī” ti.

etam-atthaṁ bhagavā avoca, tatthetaṁ iti vuccati:

−−⏑−¦−−−−¦¦⏑−−−¦⏑−⏑−   mavipulā
“evaṁ cĕ sattā jāneyyuṁ   yathā vuttaṁ mahesinā,

⏑−−−¦⏑−−−¦¦⏑−−⏑¦⏑−⏑−
vipākaṁ saṁvibhāgassa   yathā hoti mahapphalaṁ, [1]

⏑−−−¦−⏑⏑−¦¦−⏑−−¦⏑−⏑−   bhavipulā
vineyyuṁ maccheramalaṁ   vippasannena cetasā,

−−−−¦⏑−−−¦¦−⏑−−¦⏑−⏑−
dajjuṁ kālena ariyesu   yattha dinnaṁ mahapphalaṁ. [2]

−−⏑−¦−⏑⏑−¦¦−⏑−−¦⏑−⏑−   bhavipulā
annaṁ ca datvā bahuno   dakkhiṇeyyesu dakkhiṇaṁ,

⏑−⏑−¦⏑−−−¦¦−−−−¦⏑−⏑−
ito cutā manussattā   saggaṁ gacchanti dāyakā, [3]

−⏑−−¦⏑−−−¦¦−−⏑−¦⏑−⏑−
te ca saggaṁ gatā tattha   modanti kāmakāmino,

⏑−−−¦⏑−−−¦¦⏑⏑−⏑¦⏑−⏑−
vipākaṁ saṁvibhāgassa   anubhonti amaccharā” ti. [4]

ayam-pi attho vutto bhagavatā, iti me sutan-ti.