Itivuttakapāḷi

2. 1. 6. Bhaddakasīlasuttaṁ (33)

[BJT Page 354]

vuttaṁ hetaṁ bhagavatā, vuttam-arahatā ti me sutaṁ:

“dvīhi bhikkhave dhammehi samannāgato yathā bhataṁ nikkhitto evaṁ sagge. katamehi dvīhi? bhaddakena ca sīlena, bhaddikāya ca diṭṭhiyā. imehi kho bhikkhave dvīhi dhammehi samannāgato puggalo yathā bhataṁ nikkhitto evaṁ sagge” ti.

etam-atthaṁ bhagavā avoca, tatthetaṁ iti vuccati:

−⏑−⏑¦⏑−−−¦¦−⏑−⏑¦⏑−⏑−
“bhaddakena ca sīlena   bhaddikāya ca diṭṭhiyā,

−−⏑−¦⏑−−−¦¦−⏑−−¦⏑−⏑−
etehi dvīhi dhammehi   yo samannāgato naro

−−⏑−¦−−−−¦¦−−−⏑¦⏑−⏑−   mavipulā
kāyassa bhedā sappañño   saggaṁ so upapajjatī” ti. [1]

ayam-pi attho vutto bhagavatā, iti me sutan-ti.