Itivuttakapāḷi

2. 2. 4. Paññāparihānisuttaṁ (41)

[BJT Page 364]

vuttaṁ hetaṁ bhagavatā, vuttam-arahatā ti me sutaṁ:

“te bhikkhave sattā suparihīnā, ye ariyāya paññāya parihīnā, te diṭṭheva dhamme dukkhaṁ viharanti savighātaṁ sa-upāyāsaṁ sapariḷāhaṁ, kāyassa bhedā param-maraṇā duggati pāṭikaṅkhā. te bhikkhavo sattā aparihīnā, ye ariyāya paññāya aparihīnā, te diṭṭheva dhamme sukhaṁ viharanti avighātaṁ anupāyāsaṁ apariḷāhaṁ kāyassa bhedā param-maraṇā sugati pāṭikaṅkhā” ti.

etam-atthaṁ bhagavā avoca, tatthetaṁ iti vuccati:

−−⏑⏑¦⏑−−−¦¦−⏑−−¦⏑−⏑−
“paññāya parihānena   passa lokaṁ sadevakaṁ,

⏑−−−¦⏑−−−¦¦⏑−−−¦⏑−⏑−
niviṭṭhaṁ nāmarūpasmiṁ   idaṁ saccan-ti maññati. [1]

−−⏑−¦−−−−¦¦−−−−¦⏑−⏑−   mavipulā
paññā hi seṭṭhā lokasmiṁ   yāyaṁ nibbedhagāminī,

−⏑−−¦⏑−−−¦¦−⏑⏑⏑¦⏑−⏑−
yāya sammā pajānāti   jātibhavaparikkhayaṁ. [2]

−−−−¦⏑−−−¦¦−−−−¦⏑−⏑−
tesaṁ devā manussā ca   sambuddhānaṁ satīmataṁ,

⏑⏑−⏑−¦⏑−−−¦¦⏑−−⏑¦⏑−⏑−
pihayanti hāsapaññānaṁ   sarīrantimadhārinan”-ti. [3]

ayam-pi attho vutto bhagavatā, iti me sutan-ti.