Itivuttakapāḷi

2. 2. 5. Sukkadhammasuttaṁ (42)

vuttaṁ hetaṁ bhagavatā, vuttam-arahatā ti me sutaṁ:

“dve me bhikkhave sukkā dhammā lokaṁ pālenti. katame dve? hiri ca ottappañ-ca. ime kho bhikkhave dve sukkā dhammā lokaṁ na pāleyyuṁ, na-y-idha paññāyetha mātā ti vā, mātucchā ti vā, mātulānī ti vā, ācariyahariyā ti vā, garūnaṁ dārā ti vā, sambhedaṁ loko agamissa yathā ajeḷakā kukkuṭasūkarā soṇasigālā. yasmā ca kho bhikkhave ime dve sukkā dhammā lokaṁ pālenti, tasmā paññāyati mātā- ti vā, mātucchā ti vā, mātulānī ti vā, acariyahariyā ti vā, garūnaṁ dārā ti vā” ti.

[BJT Page 366]

etam-atthaṁ bhagavā avoca, tatthetaṁ iti vuccati:

−−−⏑¦⏑−−−¦¦−⏑−⏑¦⏑−⏑−
“yesaṁ ce hiri-ottappaṁ   sabbadā ca na vijjati,

−−−−¦⏑−−−¦¦−⏑⏑⏑¦⏑−⏑−
vokkantā sukkamūlā te   jātimaraṇagāmino. [1]

−−⏑⏑¦⏑−−−¦¦⏑−−−¦⏑−⏑−
yesañ-ca hiri-ottappaṁ   sadā sammā upaṭṭhitā,

⏑−⏑−¦⏑−−−¦¦−−−⏑¦⏑−⏑−
virūḷhabrahmacariyā te   santo khīṇapunabbhavā” ti. [2]

ayam-pi attho vutto bhagavatā, iti me sutan-ti.