Itivuttakapāḷi

Tatiyo vaggo

[BJT Page 398]

3. 3. 1. Micchādiṭṭhikammasamādānasuttaṁ (70)

vuttaṁ hetaṁ bhagavatā, vuttam-arahatā ti me sutaṁ:

“diṭṭhā mayā bhikkhave sattā kāyaduccaritena samannāgatā, vacīduccaritena samannāgatā, manoduccaritena samannāgatā, ariyānaṁ upavādakā, micchādiṭṭhikā micchādiṭṭhikammasamādānā, te kāyassa bhedā param-maraṇā apāyaṁ duggatiṁ vinipātaṁ nirayaṁ upapannā. taṁ kho panāhaṁ bhikkhave nāññassa samaṇassa vā brāhmaṇassa vā sutvā vadāmi.

diṭṭhā mayā bhikkhave sttā kāyaduccaritena samannāgatā, vacīduccaritena samannāgatā, manoduccaritena smannāgatā, ariyānaṁ upavādakā, micchādiṭṭhikā micchādiṭṭhikammasamādānā, te kāyassa bhedā param-maraṇā apāyaṁ duggatiṁ vinipātaṁ nirayaṁ upapannā. api ca bhikkhave yad-eva sāmaṁ ñātaṁ, sāmaṁ diṭṭhaṁ, sāmaṁ viditaṁ tad-evāhaṁ vadāmi.

diṭṭhā mayā bhikkhave sattā kāyaduccaritena samannāgatā, vacīduccaritena samannāgatā, manoduccaritena samannāgatā, ariyānaṁ upavādakā, micchādiṭṭhikā micchādiṭṭhikammasamādānā, te kāyassa bhedā param-maraṇā apāyaṁ duggatiṁ vinipātaṁ nirayaṁ upapannā” ti.

etam-atthaṁ bhagavā avoca, tatthetaṁ iti vuccati:

−−⏑−¦⏑⏑−−¦¦−−−−¦⏑−⏑−   savipulā
“micchā manaṁ panidhāya,   micchā vācaṁ ca bhāsiya, BJT Note: micchāvācaṁ abhāsiya - Palm leaf book, Printed book.01
−−−−¦⏑−−−¦¦−−⏑⏑¦⏑−⏑−
micchā kammāni katvāna,   kāyena idha puggalo, [1]

⏑−¦−⏑⏑−¦¦−−−⏑¦⏑−⏑−   bhavipulā
appassutopuññakaro,   appasmiṁ idha jīvite,

−−⏑−¦−−−−¦¦⏑⏑−−⏑¦⏑−⏑−   mavipulā
kāyassa bhedā duppañño   nirayaṁ so upapajjatī” ti. [2]

ayam-pi attho vutto bhagavatā, iti me sutan-ti.