Itivuttakapāḷi

3. 3. 2. Sammādiṭṭhikammasamādānasuttaṁ (71)

[BJT Page 400]

vuttaṁ hetaṁ bhagavatā, vuttam-arahatā ti me sutaṁ:

“diṭṭhā mayā bhikkhave sattā kāyasucaritena samannāgatā, vacīsucaritena samannāgatā, manosucaritena samannāgatā, ariyānaṁ anupavādakā, sammādiṭṭhikā sammādiṭṭhikammasamādānā, te kāyassa bhedā param-maraṇā sugatiṁ saggaṁ lokaṁ upapannā. taṁ kho panāhaṁ bhikkhave nāññassa samaṇassa vā brāhmaṇassa vā sutvā vadāmi.

diṭṭhā mayā bhikkhave sattā kāyasucaritena samannāgatā, vacisucaritena samannāgatā, manosucaritena samannāgatā, ariyānaṁ anupavādakā sammādiṭṭhikā sammādiṭṭhikammasamādānā, te kāyassa bhedā param-maraṇā sugatiṁ saggaṁ lokaṁ upapannā. api ca bhikkhave yad-eva sāmaṁ ñātaṁ, sāmaṁ diṭṭhaṁ, sāmaṁ viditaṁ tad-evāhaṁ vadāmi.

diṭṭhā mayā bhikkhave sattā kāyasucaritena samannāgatā, vacīsucaritena samannāgatā, manosucaritena samannāgatā, ariyānaṁ anupavādakā, sammādiṭṭhikā sammādiṭṭhikammasamādānā, te kāyassa bhedā param-maraṇā sugatiṁ saggaṁ lokaṁ upapannā” ti.

etam-atthaṁ bhagavā avoca, tatthetaṁ iti vuccati:

−−⏑−¦⏑⏑−−¦¦−−−−¦⏑−⏑−   savipulā
“sammā manaṁ panidhāya,   sammā vācaṁ ca bhāsiya, BJT Note: sammāvācaṁ abhāsiya - Palm leaf book, Printed book.01
−−−−¦⏑−−−¦¦−−⏑⏑¦⏑−⏑−
sammā kammāni katvāna,   kāyena idha puggalo, [1]

⏑−⏑−¦−⏑⏑−¦¦−−−⏑¦⏑−⏑−   bhavipulā
bahussuto puññakaro,   appasmiṁ idha jīvite,

−−⏑−¦−−−−¦¦−−−⏑¦⏑−⏑−   mavipulā
kāyassa bhedā sappañño   saggaṁ so upapajjatī” ti. [2]

ayam-pi attho vutto bhagavatā, iti me sutan-ti.