Itivuttakapāḷi

Catuttho vaggo

[BJT Page 416]

3. 4. 1. Vitakkasuttaṁ (80)

vuttaṁ hetaṁ bhagavatā, vuttam-arahatā ti me sutaṁ:

“tayome bhikkhave akusalavitakkā. katame tayo? anavaññattipaṭisaṁyutto vitakko, lābhasakkārasilokapaṭisaṁyutto vitakko, parānuddayatāpaṭisaṁyutto vitakko. ime kho bhikkhave tayo akusalavitakkā” ti.

etam-atthaṁ bhagavā avoca, tatthetaṁ iti vuccati:

⏑⏑−−¦⏑−−−¦¦−⏑−−¦⏑−⏑−
“anavaññattisaṁyutto   lābhasakkāragāravo,

⏑⏑−−¦⏑−−−¦¦−−−−¦⏑−⏑−
sahanandī amaccehi   ārā saṁyojanakkhayā. [1]

−⏑−⏑¦⏑−−−¦¦⏑−−−¦⏑−⏑−
yo ca puttapasuṁ hitvā   vivāhe saṅgahāni ca,

−−−−¦⏑−−−¦¦−−−−¦⏑−⏑−
bhabbo so tādiso bhikkhu   phuṭṭhuṁ sambodhim-uttaman”-ti. [2]

ayam-pi attho vutto bhagavatā, iti me sutan-ti.