Itivuttakapāḷi

3. 4. 4. Pubbanimittasuttaṁ (83)

vuttaṁ hetaṁ bhagavatā, vuttam-arahatā ti me sutaṁ:

“yadā bhikkhave devo devakāyā cavanadhammo hoti, pañcassa pubbanimittāni pātubhavanti: mālā milāyanti, vatthāni kilissanti, kacchehi sedā muccanti, kāye dubbaṇṇiyaṁ okkamati, sake devo devāsane nābhiramatī” ti.

[BJT Page 422]

tam-enaṁ bhikkhave devā cavanadhammo ayaṁ devaputto ti iti viditvā tīhi vācāhi anumodanti: “ito bho sugatiṁ gaccha, sugatiṁ gantvā suladdhalābhaṁ labha, suladdhalābhaṁ labhitvā suppatiṭṭhito bhavāhī” ti.

evaṁ vutte aññataro bhikkhu bhagavantaṁ etad-aoca: “kin-nu kho bhante devānaṁ sugatigamanasaṅkhātaṁ, kiñ-ca bhante devānaṁ suladdhalābhasaṅkhātaṁ, kim-pana bhante devānaṁ suppatiṭṭhitasaṅkhātan”-ti?

“manussattaṁ kho bhikkhu devānaṁ sugatigamanasaṅkhātaṁ. yaṁ manussabhūto samāno tathāgatappavedite dhammavinaye saddhaṁ paṭilabhati, idaṁ kho pana bhikkhave devānaṁ suladdhalābhasaṅkhātaṁ. sā kho panassa saddhā niviṭṭhā hoti mūlajātā patiṭṭhitā daḷhā asaṁhāriyā samaṇena vā brāhmaṇena vā devena vā mārena vā brahmunā vā kenaci vā lokasmiṁ. idaṁ kho bhikkhave devānaṁ suppatiṭṭhitasaṅkhātan”-ti.

etam-atthaṁ bhagavā avoca, tatthetaṁ iti vuccati:

⏑−−−¦−⏑−−¦¦⏑⏑⏑−¦⏑−⏑−   ravipulā Metre: Note that 2 successive light syllables in 2nd & 3rd positions are normally avoided.01
“yadā devo devakāyā   cavati āyusaṅkhayā,

⏑−−−¦−⏑−−¦¦−−−⏑¦⏑−⏑−   ravipulā
tayo saddā niccharanti   devānaṁ anumodataṁ: [1]

⏑−−⏑¦⏑−−−¦¦⏑−−−¦⏑−⏑−
ito bho sugatiṁ gaccha   manussānaṁ sahavyataṁ,

⏑−⏑−¦−−−−¦¦⏑⏑−−¦⏑−⏑−   mavipulā
manussabhūto saddhamme,   labha saddhaṁ anuttaraṁ. [2]

−−−−¦⏑−−−¦¦−⏑−−¦⏑−⏑−
sā te saddhā niviṭṭhassa,   mūlajātā patiṭṭhitā,

−⏑−−¦⏑−−−¦¦−−−−¦⏑−⏑−
yāvajīvaṁ asaṁhīrā,   saddhamme suppavedite. [3]

−⏑−⏑¦⏑−−−¦¦⏑−−⏑¦⏑−⏑−
kāyaduccaritaṁ hitvā,   vacīduccaritāni ca,

⏑−−⏑¦⏑−−−¦¦−−−−¦⏑−⏑−
manoduccaritaṁ hitvā,   yañ-caññaṁ dosasañhitaṁ. [4]

−−⏑⏑¦⏑−−−¦¦−−⏑⏑¦⏑−⏑−
kāyena kusalaṁ katvā,   vācāya kusalaṁ bahuṁ,

⏑⏑−⏑¦⏑−−−¦¦−⏑−−¦⏑−⏑−
manasā kusalaṁ katvā,   appamāṇaṁ nirūpadhiṁ [5]

⏑−−⏑¦⏑−−−¦¦−−−−¦⏑−⏑−
tato opadhikaṁ puññaṁ,   katvā dānena taṁ bahuṁ,

−−⏑−¦−−−−¦¦−⏑−−¦⏑−⏑−   mavipulā
aññe pi macce saddhamme   brahmacariye nivesaya. BJT Note: nivesaye - Palm leaf book.02 [6]

⏑−⏑⏑¦⏑−−−¦¦−−−−¦⏑−⏑−
imāya anukampāya   devā devaṁ yadā vidū,

⏑−−⏑¦⏑−−−¦¦−⏑−⏑¦⏑−⏑−
cavantaṁ anumodanti   ehi deva punappunan”-ti. [7]

ayam-pi attho vutto bhagavatā, iti me sutan-ti.