Itivuttakapāḷi

3. 4. 8. Andhakaraṇasuttaṁ (87)

[BJT Page 430]

vuttaṁ hetaṁ bhagavatā, vuttam-arahatā ti me sutaṁ:

“tayome bhikkhave akusalavitakkā andhakaraṇā acakkhukaraṇā aññāṇakaraṇā paññānirodhikā vighātapakkhikā anibbānasaṁvattanikā. katame tayo?

kāmavitakko bhikkhave andhakaraṇo acakkhukaraṇo aññāṇakaraṇo paññānirodhiko vighātapakkhiko anibbānasaṁvattaniko; vyāpādavitakko bhikkhave andhakaraṇo acakkhukaraṇo aññāṇakaraṇo paññānirodhiko vighātapakkhiko anibbānasaṁvattaniko; vihiṁsāvitakko bhikkhave andhakaraṇo acakkhukaraṇo aññāṇakaraṇo paññānirodhiko vighātapakkhiko anibbānasaṁvattaniko.

ime kho bhikkhave tayo akusalavitakkā andhakaraṇā acakkhukaraṇā aññāṇakaraṇā paññānirodhikā vighātapakkhikā anibbānasaṁvattanikā.

tayome bhikkhave kusalavitakkā anandhakaraṇā cakkhukaraṇā ñāṇakaraṇā paññāvuddhikā avighātapakkhikā nibbānasaṁvattanikā. katame tayo?

nekkhammavitakko bhikkhave anandhakaraṇo cakkhukaraṇo ñāṇakaraṇo paññāvuddhiko avighātapakkhiko nibbānasaṁvattaniko; avyāpādavitakko bhikkhave anandhakaraṇo cakkhukaraṇo ñāṇakaraṇo paññāvuddhiko avighātapakkhiko nibbānasaṁvattaniko; avihiṁsāvitakko bhikkhave anandhakaraṇo cakkhukaraṇo ñāṇakaraṇo paññāvuddhiko avighātapakkhiko nibbānasaṁvattaniko.

ime kho bhikkhave tayo kusalavitakkā anandhakaraṇā cakkhunakaraṇā ñāṇakaraṇā paññāvuddhikā avighātapakkhikā nibbānasaṁvattanikā” ti.

[BJT Page 432]

etam-atthaṁ bhagavā avoca, tatthetaṁ iti vuccati:

⏑−⏑−¦−,⏑⏑¦−⏑−⏑−   Jagatī x 2
“tayo vitakke kusale vitakkaye,

⏑−⏑⏑,¦⏑⏑⏑¦−⏑−⏑− Metre: Note that the 4th syllable is unexpectedly light in the opening. There are no variant readings recorded in BJT, PTS, or ChS.01
tayo pana akusale nirākare,

⏑−⏑−¦−⏑,⏑¦−⏑−−   Tuṭṭhubha
sa ve vitakkāni vicāritāni,

⏑−⏑−¦−⏑,⏑¦−⏑−⏑−   Jagatī x 3
sameti vuṭṭhīva rajaṁ samūhataṁ.

⏑−⏑−¦−⏑⏑¦−⏑−⏑−
sa ve vitakkūpasamena cetasā,

⏑−⏑−,¦−⏑⏑¦−⏑−⏑−
idheva so santipadaṁ samajjhagā” ti. [1]

ayam-pi attho vutto bhagavatā, iti me sutan-ti.