Itivuttakapāḷi

Pañcamo vaggo

[BJT Page 438]

3. 5. 1. Aggappasādasuttaṁ (90)

vuttaṁ hetaṁ bhagavatā, vuttam-arahatā ti me sutaṁ:

“tayome bhikkhave aggappasādā. katame tayo?

yāvatā bhikkhave sattā apadā vā dipadā vā catuppadā vā bahuppadā vā rūpino vā arūpino vā saññino vā asaññino vā nevasaññināsaññino vā, tathāgato tesaṁ aggam-akkhāyati yadidaṁ arahaṁ sammāsambuddho. ye bhikkhave buddhe pasannā agge te pasannā, agge kho pana pasannānaṁ aggo vipāko hoti.

yāvatā bhikkhave dhammā saṅkhatā vā asaṅkhatā vā virāgo tesaṁ aggam-akkhāyati yadidaṁ madanimmadano pipāsavinayo ālayasamugghāto vaṭṭupacchedo taṇhakkhayo virāgo nirodho nibbānaṁ. Editor's note: BJT prints nibbāṇaṁ.01 ye bhikkhave virāge dhamme pasannā agge te pasannā, agge kho pana pasannānaṁ aggo vipāko hoti.

yāvatā bhikkhave saṅghā vā gaṇā va tathāgatasāvakasaṅgho tesaṁ aggam-akkhāyati yadidaṁ cattāri purisayugāni aṭṭhapurisapuggalā, esa bhagavato sāvakasaṅgho āhuneyyo pāhuneyyo dakkhiṇeyyo añjalikaraṇīyo anuttaraṁ puññakkhettaṁ lokassa. ye bhikkhave saṅghe pasannā agge te pasannā agge kho pana pasannānaṁ aggo vipāko hoti.

ime kho bhikkhave tayo aggappasādā” ti.

etam-atthaṁ bhagavā avoca, tatthetaṁ iti vuccati:

−⏑−−¦⏑−−−¦¦−−−−¦⏑−⏑−
“aggato ve pasannānaṁ   aggaṁ dhammaṁ vijānataṁ,

−−−−¦⏑−−−¦¦−⏑−−¦⏑−⏑−
agge buddhe pasannānaṁ   dakkhiṇeyye anuttare. [1]

[BJT Page 440]

−−−−¦⏑−−−¦¦⏑−−⏑¦⏑−⏑−
agge dhamme pasannānaṁ   virāgūpasame sukhe,

−−−−¦⏑−−−¦¦−−−−¦⏑−⏑−
agge saṅghe pasannānaṁ   puññakkhette anuttare. [2]

−−−−¦−⏑⏑−¦¦−−−−¦⏑−⏑−   bhavipulā
aggasmiṁ dānaṁ dadataṁ   aggaṁ puññaṁ pavaḍḍhati,

−−−⏑¦⏑−−−¦¦⏑−−⏑¦⏑−⏑−
aggaṁ āyu ca Editor's note: BJT reads va here, a printer's error.02 vaṇṇo ca   yaso kitti sukhaṁ balaṁ. [3]

−−⏑−¦−−−−¦¦−⏑−⏑¦⏑−⏑−   mavipulā
aggassa dātā medhāvī   aggadhammasamāhito,

−⏑−−¦⏑−−−¦¦−−−−¦⏑−⏑−
devabhūto manusso vā   aggappatto pamodatī” ti. [4]

ayam-pi attho vutto bhagavatā iti me sutan-ti.