Itivuttakapāḷi

3. 5. 3. Saṅghāṭikaṇṇasuttaṁ (92)

vuttaṁ hetaṁ bhagavatā, vuttam-arahatā ti me sutaṁ:

“saṅghāṭikaṇṇe ce pi bhikkhave bhikkhu gahetvā piṭṭhito piṭṭhito anubaddho assa, pāde pādaṁ nikkhipanto, so ca hoti abhijjhālū kāmesu tibbasārāgo byāpannacitto paduṭṭhamanasaṁkappo muṭṭhassati asampajāno asamāhito vibbhantacitto pākatindriyo atha kho so ārakā va mayhaṁ, ahaṁ ca tassa. taṁ kissa hetu? dhammaṁ hi so bhikkhave bhikkhu na passati dhammaṁ apassanto na maṁ passati.

yojanasate ce pi so bhikkhave bhikkhu vihareyya so ca hoti anabhijjhālū kāmesu na tibbasārāgo abyāpannacitto appaduṭṭhamanasaṁkappo upaṭṭhitasati sampajāno samāhito ekaggacitto saṁvutindriyo, atha kho so santike va mayhaṁ, ahaṁ ca tassa. taṁ kissa hetu? dhammaṁ hi so bhikkhave bhikkhu passati dhammaṁ passanto maṁ passatī” ti.

[BJT Page 444]

etam-atthaṁ bhagavā avoca, tatthetaṁ iti vuccati:

⏑⏑−−¦⏑−−−¦¦⏑−−⏑¦⏑−⏑−   pathyā throughout
“anubaddho pi ce assa   mahiccho ca vighātavā,

−−⏑−¦⏑−−−¦¦−⏑−⏑¦⏑−⏑−
ejānugo anejassa   nibbutassa anibbuto,

−−−−¦⏑−−−¦¦−⏑−−¦⏑−⏑−
giddho so vītagedhassa   passa yāvañ-ca ārakā. [1]

−⏑−⏑¦⏑−−−¦¦−⏑−−¦⏑−⏑−
so ca dhammam-abhiññāya   dhammam-aññāya paṇḍito,

⏑⏑−⏑¦⏑−−−¦¦⏑−−−¦⏑−⏑−
rahado va nivāte ca   anejo vūpasammati. [2]

⏑−−−¦⏑−−−¦¦−⏑−⏑¦⏑−⏑−
anejo so anejassa   nibbutassa ca nibbuto,

⏑−−−¦⏑−−−¦¦−⏑−−¦⏑−⏑−
agiddho vītagedhassa   passa yāvañ-ca santike” ti. [3]

ayam-pi attho vutto bhagavatā, iti me sutan-ti.