Itivuttakapāḷi

3. 5. 8. Kalyāṇasīlasuttaṁ (97)

[BJT Page 450]

vuttaṁ hetaṁ bhagavatā, vuttam-arahatā ti me sutaṁ:

“kalyāṇasīlo bhikkhave bhikkhu kalyāṇadhammo kalyāṇapañño imasmiṁ dhammavinaye kevalī vusitavā uttamapuriso ti vuccati.

kathañ-ca bhikkhave bhikkhu kalyāṇasīlo hoti? idha bhikkhave bhikkhu sīlavā hoti pātimokkhasaṁvarasaṁvuto viharati, ācāragocarasampanno anumattesu vajjesu bhayadassāvī samādāya sikkhati sikkhāpadesu. evaṁ kho bhikkhave bhikkhu kalyāṇasīlo hoti: iti kalyāṇasīlo.

kalyāṇadhammo ca kathaṁ hoti? idha bhikkhave bhikkhu sattannaṁ bodhipakkhiyānaṁ dhammānaṁ bhāvanānuyogam-anuyutto viharati. evaṁ kho bhikkhave bhikkhu kalyāṇadhammo hoti: iti kalyāṇasīlo kalyāṇadhammo.

kalyāṇapañño ca kathaṁ hoti? idha bhikkhave bhikkhu āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati. evaṁ kho bhikkhave bhikkhu kalyāṇapañño hoti: iti kalyāṇasīlo kalyāṇadhammo kalyāṇapañño imasmiṁ dhammavinaye kevalī vusitavā uttamapuriso ti vuccatī” ti.

etam-atthaṁ bhagavā avoca, tatthetaṁ iti vuccati:

−⏑−−¦⏑−−−¦¦⏑⏑−−¦⏑−⏑−
“yassa kāyena vācāya   manasā natthi dukkaṭaṁ,

−−−−¦⏑−−−¦¦−⏑−−¦⏑−⏑−
taṁ ve kalyāṇasīlo ti   āhu bhikkhuṁ hirīmanaṁ. [1]

−⏑−−¦⏑−⏑−¦¦−⏑−−¦⏑−⏑−   Anuṭṭhubha
yassa dhammā subhāvitā   satta sambodhagāmino,

−−−−¦⏑−−−¦¦−⏑−−¦⏑−⏑−
taṁ ve kalyāṇadhamme ti   āhu bhikkhuṁ anussadaṁ. [2]

−−−⏑¦⏑−−−¦¦⏑−⏑⏑¦⏑−⏑−
yo dukkhassa pajānāti   idheva khayam-attano,

−−−−¦⏑−−−¦¦−⏑−−¦⏑−⏑−
taṁ ve kalyāṇapañño ti   āhu bhikkhuṁ anāsavaṁ. [3]

[BJT Page 452]

−⏑−−¦⏑−−−¦¦⏑−−−¦⏑−⏑−
tehi dhammehi sampannaṁ   anīghaṁ chinnasaṁsayaṁ,

⏑⏑−−¦⏑−−−¦¦−⏑−−¦⏑−⏑−
asitaṁ sabbalokassa   āhu sabbappahāyinan”-ti. [4]

ayam-pi attho vutto bhagavatā, iti me sutan-ti.