Itivuttakapāḷi

3. 5. 9. Dānasuttaṁ (98)

vuttaṁ hetaṁ bhagavatā, vuttam-arahatā ti me sutaṁ:

“dvemāni bhikkhave dānāni āmisadānañ-ca dhammadānañ-ca, etad-aggaṁ bhikkhave imesaṁ dvinnaṁ dānānaṁ yadidaṁ dhammadānaṁ. dveme bhikkhave saṁvibhāgā āmisasaṁvibhāgo ca dhammasaṁvibhāgo ca, etad-aggaṁ bhikkhave imesaṁ dvinnaṁ saṁvibhāgānaṁ yadidaṁ dhammasaṁvibhāgo. dveme bhikkhave anuggahā āmisānuggaho ca dhammānuggaho ca, etad-aggaṁ bhikkhave imesaṁ dvinnaṁ anuggahānaṁ yadidaṁ dhammānuggaho” ti.

etam-atthaṁ bhagavā avoca, tatthetaṁ iti vuccati:

⏑−⏑−¦−,⏑⏑¦−⏑−⏑−   Jagatī x 2
“yam-āhu dānaṁ paramaṁ anuttaraṁ,

−−⏑−¦−,⏑⏑¦−⏑−⏑−
yaṁ saṁvibhāgaṁ bhagavā avaṇṇayī,

−−⏑−¦−⏑,⏑¦−⏑−−   Tuṭṭhubha x 2
aggamhi khettamhi pasannacitto,

−−⏑−¦−,−⏑⏑¦−⏑−−
viññū pajānaṁ ko na yajetha kāle. [1]

−−⏑−¦−⏑,⏑¦−⏑−⏑−   Jagatī x 4
ye ceva bhāsanti suṇanti cūbhayaṁ,

⏑−⏑−¦−,⏑⏑¦−⏑−⏑−
pasannacittā sugatassa sāsane,

−−⏑−¦−,⏑⏑¦−⏑−⏑−
tesaṁ sŏ attho paramo visujjhati,

−−⏑−¦−,⏑⏑¦−⏑−⏑−
ye appamattā sugatassa sāsane” ti. [2]

ayam-pi attho vutto bhagavatā, iti me sutan-ti.