Itivuttakapāḷi

3. 5. 10. Tevijjasuttaṁ (99)

[BJT Page 454]

vuttaṁ hetaṁ bhagavatā, vuttam-arahatā ti me sutaṁ:

“dhammenāhaṁ bhikkhave tevijjaṁ brāhmaṇaṁ paññāpemi nāññaṁ lapitalāpanamattena. kathañ-ca bhikkhave dhammena tevijjaṁ brāhmaṇaṁ paññāpemi nāññaṁ lapitalāpanamattena?

idha bhikkhave bhikkhu anekavihitaṁ pubbenivāsaṁ anussarati, seyyathīdaṁ: ekam-pi jātiṁ, dve pi jātiyo, tisso pi jātiyo, catasso pi jātiyo, pañca pi jātiyo, dasa pi jātiyo, vīsam-pi jātiyo, tiṁsam-pi jātiyo, cattāḷīsam-pi jātiyo, paññāsam-pi jātiyo, jātisatam-pi, jātisahassam-pi, jātisatasahassam-pi, aneke pi saṁvaṭṭakappe, aneke pi vivaṭṭakappe, aneke pi saṁvaṭṭavivaṭṭakappe, amutrāsaṁ evaṁnāmo evaṁgotto evaṁvaṇṇo evam-āhāro evaṁsukhadukkhapaṭisaṁvedī evam-āyupariyanto. so tato cuto amutra upapādiṁ. BJT Note: udapādiṁ - Seen somewhere.01 tatrāpāsiṁ evaṁnāmo evaṁgotto evaṁvaṇṇo evam-āhāro evaṁsukhadukkhapaṭisaṁvedī evam-āyupariyanto. so tato cuto idhūpapanno ti. iti sākāraṁ sa-uddesaṁ anekavihitaṁ pubbenivāsaṁ anussarati. ayam-assa paṭhamā vijjā adhigatā hoti, avijjā vihatā, vijjā uppannā, tamo vihato, āloko uppanno, yathā taṁ appamattassa ātāpino pahitattassa viharato.

puna caparaṁ bhikkhave bhikkhu dibbena cakkhunā visuddhena atikkantamānusakena satte passati cavamāne upapajjamāne hīne paṇīte suvaṇṇe dubbaṇṇe sugate duggate yathākammūpage satte pajānāti: ime vata bhonto sattā kāyaduccaritena samannāgatā, vacīduccaritena samannāgatā, manoduccaritena samannāgatā, ariyānaṁ upavādakā micchādiṭṭhikā micchādiṭṭhikammasamādānā, te kāyassa bhedā param-maraṇā apāyaṁ duggatiṁ vinipātaṁ nirayaṁ upapannā. ime vā pana bhonto sattā kāyasucaritena samannāgatā, vacīsucaritena samannāgatā, manosucaritena samannāgatā, ariyānaṁ anupavādakā, sammādiṭṭhikā sammādiṭṭhikammasamādānā, te kāyassa bhedā param-maraṇā sugatiṁ saggaṁ lokaṁ upapannā ti. iti dibbena cakkhunā visuddhena atikkantamānusakena satte passati cavamāne upapajjamāne hīne paṇīte suvaṇṇe dubbaṇṇe sugate duggate yathākammūpage satte pajānāti. ayam-assa dutiyā vijjā adhigatā hoti, avijjā vihatā, vijjā uppannā, tamo vihato, āloko uppanno, yathā taṁ appamattassa ātāpino pahitattassa viharato.

[BJT Page 456]

puna caparaṁ bhikkhave bhikkhu āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharati. ayam-assa tatiyā vijjā adhigatā hoti, avijjā vihatā, vijjā uppannā, tamo vihato, āloko uppanno, yathā taṁ appamattassa ātāpino pahitattassa viharato.

evaṁ kho ahaṁ bhikkhave dhammena tevijjaṁ brāhmaṇaṁ paññāpemi nāññaṁ lapitalāpanamattenā” ti.

etam-atthaṁ bhagavā avoca, tatthetaṁ iti vuccati:

−−⏑−¦−−−−¦¦−−−−¦⏑−⏑−   mavipulā
“pubbenivāsaṁ yo vedi   saggāpāyañ-ca passati,

⏑−−−¦⏑−−−¦¦⏑−−−¦⏑−⏑−
atho jātikkhayaṁ patto   abhiññā vosito muni. [1]

−−⏑−¦⏑−−−¦¦−−−−¦⏑−⏑−
etāhi tīhi vijjāhi   tevijjo hoti brāhmaṇo,

⏑⏑−⏑−¦⏑−−−¦¦−−⏑⏑¦⏑−⏑−
tam-ahaṁ vadāmi tevijjaṁ   nāññaṁ lapitalāpanan”-ti. [2]

ayam-pi attho vutto bhagavatā, iti me sutan-ti.

Pañcamo vaggo

tassuddānaṁ:

Pasādajīvitasaṁghāṭi   Aggi Upaparikkhayā,
Upapatti Kāmakalyāṇaṁ   Dānaṁ Dhammena te dasā ti.

Tikanipāto niṭṭhito