Itivuttakapali 104: Silasampannasuttam

“ye te bhikkhave bhikkhū sīlasampannā samādhisampannā paññāsampannā vimuttisampannā vimuttiñāṇadassanasampannā ovādakā viññāpakā sandassakā samādapakā samuttejakā sampahaṁsakā alaṁ samakkhātāro saddhammassa. dassanam-pahaṁ bhikkhave tesaṁ bhikkhūnaṁ bahūpakāraṁ vadāmi; savaṇam-pahaṁ bhikkhave tesaṁ bhikkhūnaṁ bahūpakāraṁ vadāmi; upasaṅkamanam-pahaṁ bhikkhave tesaṁ bhikkhūnaṁ bahūpakāraṁ vadāmi; payirupāsanam-pahaṁ bhikkhave tesaṁ bhikkhūnaṁ bahūpakāraṁ vadāmi; anussaraṇam-pahaṁ bhikkhave tesaṁ bhikkhūnaṁ bahūpakāraṁ vadāmi; anupabbajjam-pahaṁ bhikkhave tesaṁ bhikkhūnaṁ bahūpakāraṁ vadāmi.

taṁ kissa hetu? tathārūpe bhikkhave bhikkhū sevato bhajato payirupāsato aparipūro pi sīlakkhandho bhāvanāpāripūriṁ gacchati; aparipūro pi samādhikkhandho bhāvanāpāripūriṁ gacchati; aparipūro pi paññākkhandho bhāvanāpāripūriṁ gacchati; aparipūro pi vimuttikkhandho bhāvanāpāripūriṁ gacchati; aparipūro pi vimuttiñāṇadassanakkhandho bhāvanāpāripūriṁ gacchati.

evarūpā ca te bhikkhave, bhikkhū satthāro ti pi vuccanti, satthavāhā ti pi vuccanti, raṇañjahā ti pi vuccanti, tamonudā ti pi vuccanti, ālokakarā ti pi vuccanti, obhāsakarā ti pi vuccanti, pajjotakarā ti pi vuccanti, ukkādhārā ti pi vuccanti, pabhaṅkarā ti pi vuccanti, ariyā ti pi vuccanti, cakkhumanto ti pi vuccantī” ti.

−−⏑⏑¦⏑−−−¦¦−−−⏑¦⏑−⏑− pathyā throughout
“pāmojjakaraṇaṭṭhānaṁ BJT Note: pāmujjakaraṇaṭṭhānaṁ - Palm leaf book, Printed book.⁰¹ evaṁ hoti vijānataṁ,

⏑⏑−−¦⏑−−−¦¦−−−−¦⏑−⏑−
yadidaṁ bhāvitattānaṁ arⁱyānaṁ dhammajīvinaṁ. [1]

⏑−¦⏑−−−¦¦−⏑−¦⏑⏑−⏑−
te jotayanti saddhammaṁ bhāsayanti pabhaṅkarā,

−−⏑⏑¦⏑−−−¦¦−⏑−−¦⏑−⏑−
ālokakaraṇā dhīrā cakkhumanto raṇañjahā, [2]

−−−−¦⏑−−−¦¦−⏑−−¦⏑−⏑−
yesaṁ ce sāsanaṁ sutvā sammad-aññāya paṇḍitā,

−−⏑⏑¦⏑−−−¦¦−−−⏑¦⏑−⏑−
jātikkhayam-abhiññāya nāgacchanti punabbhavan”-ti. [3]