Itivuttakapāḷi

4. 1. 9. Kuhasuttaṁ (108)

[BJT Page 472]

vuttaṁ hetaṁ bhagavatā, vuttam-arahatā ti me sutaṁ:

“ye keci bhikkhave bhikkhū kuhā thaddhā lapā siṅgī unnaḷā asamāhitā, na me te bhikkhave bhikkhū māmakā, apagatā ca te bhikkhave bhikkhū imasmā dhammavinayā, na ca te bhikkhave bhikkhū imasmiṁ dhammavinaye vuddhiṁ virūḷhiṁ vepullaṁ āpajjanti.

ye ca kho bhikkhave bhikkhū nikkuhā nillapā dhīrā atthaddhā susamāhitā, te kho me bhikkhave bhikkhū māmākā, anapagatā ca te bhikkhave bhikkhū imasmā dhammavinayā, te bhikkhave bhikkhū imasmiṁ dhammavinaye vuddhiṁ virūḷhiṁ vepullaṁ āpajjantī” ti.

etam-atthaṁ bhagavā avoca, tatthetaṁ iti vuccati:

⏑−−−¦⏑−−−¦¦−⏑−⏑¦⏑−⏑−   pathyā throuhgout
“kuhā thaddhā lapā siṅgī   unnaḷā asamāhitā,

⏑−−−¦⏑−−−¦¦−−−−¦⏑−⏑−
na te dhamme virūhanti   sammāsambuddhadesite . [1]

−⏑−−¦⏑−−−¦¦−−−⏑¦⏑−⏑−
nikkuhā nillapā dhīrā   atthaddhā susamāhitā,

−−−−¦⏑−−−¦¦−−−−¦⏑−⏑−
te ce dhamme virūhanti   sammāsambuddhadesite” ti. [2]

ayam-pi attho vutto bhagavatā, iti me sutan-ti.