Itivuttakapāḷi

4. 1. 11. Carasuttaṁ (110)

vuttaṁ hetaṁ bhagavatā, vuttam-arahatā ti me sutaṁ:

“carato ce pi bhikkhave bhikkhuno uppajjati kāmavitakko vā vyāpādavitakko vā vihiṁsāvitakko vā, tañ-ce bhikkhave bhikkhu adhivāseti nappajahati na vinodeti na byantīkaroti na anabhāvaṁ gameti, caram-pi bhikkhave bhikkhu evam-bhūto anātāpī anottappī satataṁ samitaṁ kusīto hīnaviriyo ti vuccati.

ṭhitassa ce pi bhikkhave bhikkhuno uppajjati kāmavitakko vā vyāpādavitakko vā vihiṁsāvitakko vā, tañ-ce bhikkhave bhikkhu adhivāseti nappajahati na vinodeti na byantīkaroti na anabhāvaṁ gameti; ṭhito pi bhikkhave bhikkhu evam-bhūto anātāpī anottappī satataṁ samitaṁ kusīto hīnaviriyo ti vuccati.

[BJT Page 476]

nisinnassa ce pi bhikkhave bhikkhuno uppajjati kāmavitakko vā vyāpādavitakko vā vihiṁsāvitakko vā, tañ-ce bhikkhave bhikkhu adhivāseti nappajahati na vinodeti na byantīkaroti na anabhāvaṁ gameti, nisinno pi kho bhikkhave bhikkhu evam-bhūto anātāpī anottappī satataṁ samitaṁ kusīto hīnaviriyo ti vuccati.

sayānassa ce pi bhikkhave bhikkhuno jāgarassa uppajjati kāmavitakko vā vyāpādavitakko vā vihiṁsāvitakko vā, tañ-ce bhikkhave bhikkhu adhivāseti nappajahati na vinodeti na byantīkaroti na anabhāvaṁ gameti, sayāno pi bhikkhave bhikkhu jāgaro evam-bhūto anātāpī anottappī satataṁ samitaṁ kusīto hīnaviriyo ti vuccati.

carato ce pi bhikkhave bhikkhuno uppajjati kāmavitakko vā vyāpādavitakko vā vihiṁsāvitakko vā, tañ-ce bhikkhave bhikkhu nādhivāseti pajahati vinodeti byantīkaroti anabhāvaṁ gameti, caram-pi bhikkhave bhikkhu evam-bhūto ātāpī ottappī satataṁ samitaṁ āraddhaviriyo pahitatto ti vuccati.

ṭhitassa ce pi bhikkhave bhikkhuno uppajjati kāmavitakko vā vyāpādavitakko vā vihiṁsāvitakko vā, tañ-ce bhikkhave bhikkhu nādhivāseti pajahati vinodeti byantīkaroti anabhāvaṁ gameti, ṭhito pi bhikkhave bhikkhu evam-bhūto ātāpī ottappī satataṁ samitaṁ āraddhaviriyo pahitatto ti vuccati.

nisinnassa ce pi bhikkhave bhikkhuno uppajjati kāmavitakko vā vyāpādavitakko vā vihiṁsāvitakko vā, tañ-ce bhikkhave bhikkhu nādhivāseti pajahati vinodeti byantīkaroti anabhāvaṁ gameti, nisinno pi bhikkhave bhikkhu evam-bhūto ātāpī ottappī satataṁ samitaṁ āraddhaviriyo pahitatto ti vuccati.

sayānassa ce pi bhikkhave bhikkhuno jāgarassa uppajjati kāmavitakko vā vyāpādavitakko vā vihiṁsāvitakko vā, tañ-ce bhikkhave bhikkhu nādhivāseti pajahati vinodeti byantīkaroti anabhāvaṁ gameti, sayāno pi bhikkhave bhikkhu jāgaro evam-bhūto ātāpī ottappī satataṁ samitaṁ āraddhaviriyo pahitatto ti vuccatī” ti.

[BJT Page 478]

etam-atthaṁ bhagavā avoca, tatthetaṁ iti vuccati:

⏑−−⏑¦⏑−−−¦¦⏑−−⏑¦⏑−⏑−   pathyā throuhgout
“caraṁ vā yadi vā tiṭṭhaṁ   nisinno uda vā sayaṁ,

−⏑−−¦⏑−−−¦¦−⏑−−¦⏑−⏑−
yo vitakkaṁ vitakketi   pāpakaṁ gehanissitaṁ, [1]

−−−⏑¦⏑−−−¦¦−⏑−−¦⏑−⏑−
kummaggaṁ paṭipanno so   mohaneyyesu mucchito,

⏑−−−¦⏑−−−¦¦−−−−¦⏑−⏑−
abhabbo tādiso bhikkhu   phuṭṭhuṁ sambodhim-uttamaṁ. [2]

−⏑−−¦⏑−−−¦¦⏑−−⏑¦⏑−⏑−
yo caraṁ vātha tiṭṭhaṁ vā   nisinno uda vā sayaṁ,

⏑−−⏑¦⏑−−−¦¦⏑−−⏑¦⏑−⏑−
vitakkaṁ samayitvāna   vitakkūpasame rato,

−−−−¦⏑−−−¦¦−−−−¦⏑−⏑−
bhabbo so tādiso bhikkhu   phuṭṭhuṁ sambodhim-uttaman”-ti. [3]

ayam-pi attho vutto bhagavatā, iti me sutan-ti. Editor's note: This line is missing in BJT, presumably by mistake.01