Itivuttakapāḷi

4. 1. 12. Sampannasīlasuttaṁ (111)

vuttaṁ hetaṁ bhagavatā, vuttam-arahatā ti me sutaṁ:

“sampannasīlā bhikkhave viharatha sampannapātimokkhā, pātimokkhasaṁvarasaṁvutā viharatha ācāragocarasampannā anumattesu vajjesu bhayadassāvī, samādāya sikkhatha sikkhāpadesu. sampannasīlānaṁ bhikkhave viharataṁ sampannapātimokkhānaṁ pātimokkhasaṁvarasaṁvutānaṁ viharataṁ ācāragocarasampannānaṁ anumattesu vajjesu bhayadassāvīnaṁ samādāya sikkhataṁ sikkhāpadesu, kissa bhikkhave uttariṁ karaṇīyaṁ?

carato ce pi bhikkhave bhikkhuno abhijjhā vigatā hoti, vyāpādo vigato hoti, thīnamiddhaṁ vigataṁ hoti, uddhaccakukkuccaṁ vigataṁ hoti, vicikicchā pahīṇā hoti, āraddhaṁ hoti viriyaṁ asallīnaṁ, upaṭṭhitā sati asammuṭṭhā, BJT Note: apammuṭṭhā - ChS.01 passaddho kāyo asāraddho, samāhitaṁ cittaṁ ekaggaṁ, caram-pi bhikkhave bhikkhu evam-bhūto ātāpī ottappī satataṁ samitaṁ āraddhaviriyo pahitatto ti vuccati.

[BJT Page 480]

ṭhitassa ce pi bhikkhave bhikkhuno abhijjhā vigatā hoti, vyāpādo vigato hoti, thīnamiddhaṁ vigataṁ hoti, uddhaccakukkuccaṁ vigataṁ hoti, vicikicchā pahīṇā hoti, āraddhaṁ hoti viriyaṁ asallīnaṁ, upaṭṭhitā sati asammuṭṭhā, passaddho kāyo asāraddho, samāhitaṁ cittaṁ ekaggaṁ, ṭhito pi bhikkhave bhikkhu evam-bhūto ātāpī ottappī satataṁ samitaṁ āraddhaviriyo pahitatto ti vuccati.

nisinnassa ce pi bhikkhave bhikkhuno abhijjhā vigatā hoti, vyāpādo vigato hoti, thīnamiddhaṁ vigataṁ hoti, uddhaccakukkuccaṁ vigataṁ hoti, vicikicchā pahīṇā hoti, āraddhaṁ hoti viriyaṁ asallīnaṁ, upaṭṭhitā sati asammuṭṭhā, passaddho kāyo asāraddho, samāhitaṁ cittaṁ ekaggaṁ, nisinno pi bhikkhave bhikkhu evam-bhūto ātāpī ottappī satataṁ samitaṁ āraddhaviriyo pahitatto ti vuccati.

sayānassa ce pi bhikkhave bhikkhuno abhijjhā vigatā hoti, vyāpādo vigato hoti, thīnamiddhaṁ vigataṁ hoti, uddhaccakukkuccaṁ vigataṁ hoti, vicikicchā pahīṇā hoti, āraddhaṁ hoti viriyaṁ asallīnaṁ, upaṭṭhitā sati asammuṭṭhā, passaddho kāyo asāraddho, samāhitaṁ cittaṁ ekaggaṁ, sayāno pi bhikkhave bhikkhu jāgaro evam-bhūto ātāpī ottappī satataṁ samitaṁ āraddhaviriyo pahitatto ti vuccatī” ti.

etam-atthaṁ bhagavā avoca, tatthetaṁ iti vuccati:

⏑−⏑−¦⏑−−−¦¦⏑−−−¦⏑−⏑−   pathyā throughout
“yataṁ care yataṁ tiṭṭhe   yataṁ acche yataṁ saye,

⏑−−−¦⏑−−−¦¦⏑⏑−−¦⏑−⏑−
yataṁ sammiñjaye bhikkhu   yatam-enaṁ pasāraye, [1]

−−−−¦⏑−−−¦¦−⏑−⏑¦⏑−⏑−
uddhaṁ tiriyaṁ apācīnaṁ   yāvatā jagato gati,

⏑⏑−⏑−¦⏑−−−¦¦−−−⏑¦⏑−⏑−
samavekkhitā ca dhammānaṁ   khandhānaṁ udayabbayaṁ. [2]

−−⏑−¦⏑−−−¦¦−⏑−⏑¦⏑−⏑−
evaṁ vihārim-ātāpiṁ   santavuttim-anuddhataṁ,

−−⏑⏑¦⏑−−−¦¦−⏑−−¦⏑−⏑−
cetosamathasāmīciṁ   sikkhamānaṁ sadā sataṁ,

⏑⏑−⏑¦⏑−−−¦¦−⏑−−¦⏑−⏑−
satataṁ pahitatto ti   āhu bhikkhuṁ tathāvidhan”-ti. [3]

ayam-pi attho vutto bhagavatā, iti me sutan-ti.