(Saṅghādisesuddeso)

[BJT Vol I, Page 256]

ime kho panāyasmanto terasa saṅghādisesā dhammā uddesaṁ āgacchanti.

[BJT Vol I, Page 260]

Sd 1: Sukkavisaṭṭhisikkhāpadaṁ Editor's note: this is the end title in BJT, the heading simply reads paṭhamasaṅghādisesā, but all the rest of these training rules are given distinctive titles.01

sañcetanikā sukkavisaṭṭhi, aññatra supinantā, saṅghādiseso.

[BJT Vol I, Page 294]

Sd 2: Kāyasaṁsaggasikkhāpadaṁ

yo pana bhikkhu otiṇṇo vipariṇatena cittena mātugāmena saddhiṁ kāyasaṁsaggaṁ samāpajjeyya, hatthagāhaṁ vā veṇigāhaṁ vā aññatarassa vā aññatarassa vā aṅgassa parāmasanaṁ, saṅghādiseso.

[BJT Vol I, Page 320]

Sd 3: Duṭṭhullavācāsikkhāpadaṁ

yo pana bhikkhu otiṇṇo vipariṇatena cittena mātugāmaṁ duṭṭhullāhi vācāhi obhāseyya. yathā taṁ yuvā yuvatiṁ methunūpasaṁhitāhi, saṅghādiseso.

[BJT Vol I, Page 332]

Sd 4: Attakāmapāricariyasikkhāpadaṁ

yo pana bhikkhu otiṇṇo vipariṇatena cittena mātugāmassa santike attakāmapāricariyāya vaṇṇaṁ bhāseyya: “etad-aggaṁ bhagini pāricariyānaṁ yā mādisaṁ sīlavantaṁ kalyāṇadhammaṁ brahmacāriṁ etena dhammena paricareyyā” ti, methunūpasaṁhitena, saṅghādiseso.

[BJT Vol I, Page 344]

Sd 5: Sañcarittasikkhāpadaṁ

yo pana bhikkhu sañcarittaṁ samāpajjeyya, itthiyā vā purisamatiṁ, purisassa vā itthimatiṁ, jāyattane vā jārattane vā, antamaso taṅkhaṇikāya pi, saṅghādiseso.

[BJT Vol I, Page 382]

Sd 6: Kuṭikārasikkhāpadaṁ

saññācikāya pana bhikkhunā kuṭiṁ kārayamānena assāmikaṁ attuddesaṁ pamāṇikā kāretabbā. tatridaṁ pamāṇaṁ: dīghaso dvādasa vidatthiyo sugatavidatthiyā tiriyaṁ sattantarā. bhikkhū abhinetabbā vatthudesanāya, tehi bhikkhūhi vatthuṁ desetabbaṁ anārambhaṁ saparikkamanaṁ. sārambhe ce bhikkhu vatthusmiṁ aparikkamane saññācikāya kuṭiṁ kāreyya, bhikkhū vā anabhineyya vatthudesanāya, pamāṇaṁ vā atikkāmeyya, saṅghādiseso.

[BJT Vol I, Page 406]

Sd 7: Vihārakārasikkhāpadaṁ

mahallakaṁ pana bhikkhunā vihāraṁ kārayamānena sassāmikaṁ attuddesaṁ bhikkhū abhinetabbā vatthudesanāya. tehi bhikkhūhi vatthuṁ desetabbaṁ anārambhaṁ saparikkamanaṁ. sārambhe ce bhikkhu vatthusmiṁ aparikkamane mahallakaṁ vihāraṁ kāreyya, bhikkhū vā anabhineyya vatthudesanāya, saṅghādiseso.

[BJT Vol I, Page 424]

Sd 8: Paṭhamaduṭṭhadosasikkhāpadaṁ

yo pana bhikkhu bhikkhuṁ duṭṭho doso appatīto amūlakena pārājikena dhammena anuddhaṁseyya: “appeva nāma naṁ imamhā brahmacariyā cāveyyan”-ti. tato aparena samayena samanuggāhiyamāno vā asamanuggāhiyamāno vā, amūlakañ-ceva taṁ adhikaraṇaṁ hoti, bhikkhu ca dosaṁ patiṭṭhāti, saṅghādiseso.

[BJT Vol I, Page 436]

Sd 9: Dutiyaduṭṭhadosasikkhāpadaṁ

yo pana bhikkhu bhikkhuṁ duṭṭho doso appatīto aññabhāgiyassa adhikaraṇassa kiñci desaṁ lesamattaṁ upādāya pārājikena dhammena anuddhaṁseyya: “appeva nāma naṁ imamhā brahmacariyā cāveyyan”-ti. tato aparena samayena samanuggāhiyamāno vā asamanuggāhiyamāno vā, aññabhāgiyañ-ceva taṁ adhikaraṇaṁ hoti, koci deso lesamatto upādinno, bhikkhu ca dosaṁ patiṭṭhāti, saṅghādiseso.

[BJT Vol I, Page 452]

Sd 10: Paṭhamasaṅghabhedasikkhāpadaṁ

yo pana bhikkhu samaggassa saṅghassa bhedāya parakkameyya bhedanasaṁvattanikaṁ vā adhikaraṇaṁ samādāya paggayha tiṭṭheyya. so bhikkhu bhikkhūhi evam-assa vacanīyo: “mā āyasmā samaggassa saṅghassa bhedāya parakkami bhedanasaṁvattanikaṁ vā adhikaraṇaṁ samādāya paggayha aṭṭhāsi. sametāyasmā saṅghena, samaggo hi saṅgho sammodamāno avivadamāno ekuddeso phāsu viharatī” ti. evañ-ca so bhikkhu bhikkhūhi vuccamāno tatheva paggaṇheyya, so bhikkhu bhikkhūhi yāvatatiyaṁ samanubhāsitabbo tassa paṭinissaggāya. yāvatatiyañ-ce samanubhāsiyamāno taṁ paṭinissajeyya,BJT note: paṭinissajjeyya - ChS.02 iccetaṁ kusalaṁ. no ce paṭinissajeyya, saṅghādiseso.

[BJT Vol I, Page 456]

Sd 11: Dutiyasaṅghabhedasikkhāpadaṁ

tasseva kho pana bhikkhussa bhikkhū honti anuvattakā vaggavādakā, eko vā dve vā tayo vā, te evaṁ vadeyyuṁ: “mā āyasmanto etaṁ bhikkhuṁ kiñci avacuttha, dhammavādī ceso bhikkhu, vinayavādī ceso bhikkhu, amhākañ-ceso bhikkhu; chandañ-ca, ruciñ-ca ādāya voharati, jānāti no bhāsati, amhākam-petaṁ khamatī” ti. te bhikkhū bhikkhūhi evam-assu vacanīyā: “mā āyasmanto evaṁ avacuttha. na ceso bhikkhu dhammavādī, na ceso bhikkhu vinayavādī. mā āyasmantānam-pi saṅghabhedo ruccittha. sametāyasmantānaṁ saṅghena, samaggo hi saṅgho sammodamāno avivadamāno ekuddeso phāsu viharatī” ti. evañ-ca te bhikkhū bhikkhūhi vuccamānā tatheva paggaṇheyyuṁ, te bhikkhū bhikkhūhi yāvatatiyaṁ samanubhāsitabbā tassa paṭinissaggāya. yāvatatiyañ-ce samanubhāsiyamānā taṁ paṭinissajeyyuṁ, iccetaṁ kusalaṁ. no ce paṭinissajeyyuṁ, saṅghādiseso.

[BJT Vol I, Page 462]

Sd 12: Dubbacasikkhāpadaṁ

bhikkhu paneva dubbacajātiko hoti. uddesapariyāpannesu sikkhāpadesu bhikkhūhi sahadhammikaṁ vuccamāno attānaṁ avacanīyaṁ karoti: “mā maṁ āyasmanto kiñci avacuttha, kalyāṇaṁ vā pāpakaṁ vā. aham-pāyasmante na kiñci vakkhāmi, kalyāṇaṁ vā pāpakaṁ vā. viramathāyasmanto mama vacanāyā” ti. so bhikkhu bhikkhūhi evam-assa vacanīyo: “mā āyasmā attānaṁ avacanīyaṁ akāsi. vacanīyam-evāyasmā attānaṁ karotu. āyasmā pi bhikkhū vadetu sahadhammena, bhikkhū pi āyasmantaṁ vakkhanti sahadhammena. evaṁ saṁvaddhā hi tassa bhagavato parisā, yadidaṁ aññam-aññavacanena aññam-aññavuṭṭhāpanenā” ti. evañ-ca so bhikkhu bhikkhūhi vuccamāno tatheva paggaṇheyya, so bhikkhu bhikkhūhi yāvatatiyaṁ samanubhāsitabbo tassa paṭinissaggāya. yāvatatiyañ-ce samanubhāsiyamāno taṁ paṭinissajeyya iccetaṁ kusalaṁ. no ce paṭinissajeyya, saṅghādiseso.

[BJT Vol I, Page 476]

Sd 13: Kuladūsakasikkhāpadaṁ

bhikkhu paneva aññataraṁ gāmaṁ vā nigamaṁ vā upanissāya viharati kuladūsako pāpasamācāro. tassa kho pāpakā samācārā dissanti ceva suyyanti ca. kulāni ca tena duṭṭhāni dissanti ceva suyyanti ca. so bhikkhu bhikkhūhi evam-assa vacanīyo: “āyasmā kho kuladūsako pāpasamācāro. āyasmato kho pāpakā samācārā dissanti ceva suyyanti ca. kulāni cāyasmatā duṭṭhāni dissanti ceva suyyanti ca. pakkamatāyasmā imamhā āvāsā. alan-te idha vāsenā” ti. evañ-ca so bhikkhu bhikkhūhi vuccamāno te bhikkhū evaṁ vadeyya: “chandagāmino ca bhikkhū, dosagāmino ca bhikkhū, mohagāmino ca bhikkhū, bhayagāmino ca bhikkhū. tādisikāya āpattiyā ekaccaṁ pabbājenti, ekaccaṁ na pabbājentī” ti. so bhikkhu bhikkhūhi evam-assa vacanīyo: “mā āyasmā evaṁ avaca, na ca bhikkhū chandagāmino, na ca bhikkhū dosagāmino, na ca bhikkhū mohagāmino, na ca bhikkhū bhayagāmino. āyasmā kho kuladūsako pāpasamācāro. āyasmato kho pāpakā samācārā dissanti ceva suyyanti ca. kulāni cāyasmatā duṭṭhāni dissanti ceva suyyanti ca. pakkamatāyasmā imamhā āvāsā. alan-te idha vāsenā” ti. evañ-ca so bhikkhu bhikkhūhi vuccamāno tatheva paggaṇheyya, so bhikkhu bhikkhūhi yāvatatiyaṁ samanubhāsitabbo tassa paṭinissaggāya. yāvatatiyañ-ce samanubhāsiyamāno taṁ paṭinissajeyya iccetaṁ kusalaṁ. no ce paṭinissajeyya, saṅghādiseso.

[BJT Vol I, Page 482]

uddiṭṭhā kho āyasmanto terasa saṅghādisesā dhammā, nava paṭhamāpattikā cattāro yāvatatiyakā. yesaṁ bhikkhu aññataraṁ vā aññataraṁ vā āpajjitvā, yāvatihaṁ jānaṁ paṭicchādeti, tāvatihaṁ tena bhikkhunā akāmā parivatthabbaṁ. parivutthaparivāsena bhikkhunā uttarichārattaṁ bhikkhumānattāya paṭipajjitabbaṁ. ciṇṇamānatto bhikkhu: yattha siyā vīsatigaṇo bhikkhusaṅgho, tattha so bhikkhu abbhetabbo. ekena pi ce ūno vīsatigaṇo bhikkhusaṅgho taṁ bhikkhuṁ abbheyya, so ca bhikkhu anabbhito, te ca bhikkhū gārayhā. ayaṁ tattha sāmīci.

tatthāyasmante pucchāmi: kaccittha parisuddhā?
dutiyam-pi pucchāmi: kaccittha parisuddhā?
tatiyam-pi pucchāmi: kaccittha parisuddhā?
parisuddhetthāyasmanto, tasmā tuṇhī, evam-etaṁ dhārayāmi.

(Saṅghādisesuddeso niṭṭhito)