(Nissaggiyapācittiyā - 21-30)

[BJT Vol I, Page 594]

NP 21: Pattasikkhāpadaṁ

dasāhaparamaṁ atirekapatto dhāretabbo. taṁ atikkāmayato, nissaggiyaṁ pācittiyaṁ.

[BJT Vol I, Page 600]

NP 22: Ūnapañcabandhanasikkhāpadaṁ

yo pana bhikkhu ūnapañcabandhanena pattena aññaṁ navaṁ pattaṁ cetāpeyya, nissaggiyaṁ pācittiyaṁ.

tena bhikkhunā so patto bhikkhuparisāya nissajitabbo. yo ca tassā bhikkhuparisāya pattapariyanto, so tassa bhikkhuno padātabbo: “ayaṁ te bhikkhu patto, yāva bhedanāya dhāretabbo” ti. ayaṁ tattha sāmīci.

[BJT Vol I, Page 610]

NP 23: Bhesajjasikkhāpadaṁ

yāni kho pana tāni gilānānaṁ bhikkhūnaṁ paṭisāyanīyāni bhesajjāni, seyyathīdaṁ: sappi, navanītaṁ, telaṁ, madhu, phāṇitaṁ tāni paṭiggahetvā sattāhaparamaṁ sannidhikārakaṁ paribhuñjitabbāni. taṁ atikkāmayato, nissaggiyaṁ pācittiyaṁ.

[BJT Vol I, Page 614]

NP 24: Vassikasāṭikasikkhāpadaṁ

“māso seso gimhānan”-ti: bhikkhunā vassikasāṭikacīvaraṁ pariyesitabbaṁ. “addhamāso seso gimhānan”-ti: katvā nivāsetabbaṁ. “orena ce māso seso gimhānan”-ti: vassikasāṭikacīvaraṁ pariyeseyya. “orenaddhamāso seso gimhānan”-ti: katvā nivāseyya, nissaggiyaṁ pācittiyaṁ.

[BJT Vol I, Page 618]

NP 25: Cīvara-acchindanasikkhāpadaṁ

yo pana bhikkhu bhikkhussa sāmaṁ cīvaraṁ datvā kupito Editor's note: BJT, kūpito - printer's error.01 anattamano acchindeyya vā acchindāpeyya vā, nissaggiyaṁ pācittiyaṁ.

[BJT Vol I, Page 620]

NP 26: Suttaviññattisikkhāpadaṁ

yo pana bhikkhu sāmaṁ suttaṁ viññāpetvā tantavāyehi cīvaraṁ vāyāpeyya, nissaggiyaṁ pācittiyaṁ.

[BJT Vol I, Page 624]

NP 27: Mahāpesakārasikkhāpadaṁ

bhikkhuṁ paneva uddissa aññātako gahapati vā gahapatānī vā tantavāyehi cīvaraṁ vāyāpeyya. tatra ce so bhikkhu pubbe appavārito tantavāye upasaṅkamitvā cīvare vikappaṁ āpajjeyya: “idaṁ kho āvuso cīvaraṁ maṁ uddissa viyyati āyatañ-ca karotha, vitthatañ-ca, appitañ-ca, suvītañ-ca, suppavāyitañ-ca, suvilekhitañ-ca, suvitacchitañ-ca karotha; appeva nāma mayam-pi āyasmantānaṁ kiñcimattaṁ anupadajjeyyāmā” ti. evañ-ca so bhikkhu vatvā kiñcimattaṁ anupadajjeyya antamaso piṇḍapātamattam-pi, nissaggiyaṁ pācittiyaṁ.

[BJT Vol I, Page 630]

NP 28: Accekacīvarasikkhāpadaṁ

dasāhānāgataṁ kattikatemāsikapuṇṇamaṁ, bhikkhuno paneva accekacīvaraṁ uppajjeyya, accekaṁ maññamānena bhikkhunā paṭiggahetabbaṁ. paṭiggahetvā yāva cīvarakālasamayaṁ nikkhipitabbaṁ. tato ce uttariṁ nikkhipeyya, nissaggiyaṁ pācittiyaṁ.

[BJT Vol I, Page 634]

NP 29: Sāsaṅkhasikkhāpadaṁ

upavassaṁ kho pana kattikapuṇṇamaṁ yāni kho pana tāni āraññakāni senāsanāni sāsaṅkasammatāni sappaṭibhayāni, tathārūpesu bhikkhu senāsanesu viharanto ākaṅkhamāno tiṇṇaṁ cīvarānaṁ aññataraṁ cīvaraṁ antaraghare nikkhipeyya. siyā ca tassa bhikkhuno kocid-eva paccayo tena cīvarena vippavāsāya, chārattaparamaṁ tena bhikkhunā tena cīvarena vippavasitabbaṁ. tato ce uttariṁ vippavaseyya, aññatra bhikkhusammutiyā, nissaggiyaṁ pācittiyaṁ.

[BJT Vol I, Page 638]

NP 30: Pariṇatasikkhāpadaṁ

yo pana bhikkhu jānaṁ saṅghikaṁ lābhaṁ pariṇataṁ attano pariṇāmeyya, nissaggiyaṁ pācittiyaṁ.

Pattavaggo tatiyo

[BJT Vol I, Page 640]

uddiṭṭhā kho āyasmanto tiṁsa nissaggiyā pācittiyā dhammā.

tatthāyasmante pucchāmi: kaccittha parisuddhā?
dutiyam-pi pucchāmi: kaccittha parisuddhā?
tatiyam-pi pucchāmi: kaccittha parisuddhā?
parisuddhetthāyasmanto, tasmā tuṇhī, evam-etaṁ dhārayāmi.

(Nissaggiyapācittiyā niṭṭhitā)